The Posie


O luve will venture in where it daur na weel be seen, O luve will venture in where wisdom ance has been; But I will down yon river rove, amang the woods sae green, And a' to pu' a posie to my ain dear May. The primrose I will pu', the firstling o' the year; And I will pu' the pink, the emblem o' my Dear, For she is the pink o' womankind, and blooms without a peer; And a' to be a posie to my ain dear May. I'll pu' the budding rose when Phebus peeps in view, For it's like a baumy kiss o' her sweet, bonie mou; The hyacinth's for constancy, wi' it's unchanging blue, And a' to be a posie to my ain dear May. The lily it is pure, and the lily it is fair, And in her lovely bosom I'll place the lily there; The daisy's for simplicity and unaffected air, And a' to be a posy to my ain dear May. The hawthorn I will pu', wi' its locks o' siller grey, Where like an aged man it stands at break o' day; But the songster's nest within the bush I winna tak away; And a' to be a posie to my ain dear May. The woodbine I will pu' when the e'ening star is near, And the diamond draps o' dew shall be her een sae clear; The violet's for modesty which weel she fa's to wear, And a' to be a posie to my ain dear May. I'll tie the posie round wi' the silken band o' luve, And I'll place it in her breast, and I'll swear by a' abuve, That to my latest draught o' life the band shall ne'er remove, And this will be a posie to my ain dear May.

Listen

Stuart McQuarrie

About this work

This is a song by Robert Burns. It was written in 1792 and is read here by Stuart McQuarrie.

Themes for this song

love nature woman

Skip to top

BBC © 2014 The BBC is not responsible for the content of external sites. Read more.

This page is best viewed in an up-to-date web browser with style sheets (CSS) enabled. While you will be able to view the content of this page in your current browser, you will not be able to get the full visual experience. Please consider upgrading your browser software or enabling style sheets (CSS) if you are able to do so.