BBCAlbanian.com
 
 
Dërgoja një miku   Version i printueshëm
Kosova votoi në zgjedhjet e para pas pavarësimit
 
Zgjedhjet në Kosovë
KQZ thotë se nuk ka pasur incidente serioze
Në Kosovë u zhvilluan sot zgjedhjet e para parlamentare pas shpalljes së pavarësisë gati tri vjet më parë.

Komisioni Qendror i Zgjedhjeve (KQZ) në një konferencë për gazetarë njoftoi se pjesëmarrja në votime deri në orën 15.30 ka qenë 34.10 për qind.

KQZ thotë se nuk ka pasur incidente serioze që rrezikojnë mbarëvajtjen e zgjedhjeve.

Sipas KQZ-së, të gjitha qendrat e votimit në gjithë territorin e Kosovës u hapën në orën 7 të mëngjesit, ashtu siç ishte paraparë.

Kryetarja e KQZ-s, Valdete Daka, ka thënë se në veri të Kosovës qendrat e votimit, përfshirë edhe ato të lëvizshme, janë hapur në ora 9, sipas një plani operacional të KQZ-së.

KQZ më herët njoftoi se deri në mesditë në zgjedhje kishin votuar 11.11 për qind e votuesve të Kosovës, ose mbi 181 mijë votues.

Sipas shënimeve të para të KQZ-së në Skenderaj dhe në Mamushë, komunë kjo e re me shumicë turke, është shënuar pjesëmarrje më e madhe e votuesve me rreth 24 për qind të tyre, kurse në Prishtinë pak më shumë se 7 për qind e votuesve.

Numri më i vogël i votuesve është shënuar në komunat në veri të Kosovës, të banuara me shumicë serbe: në Leposaviq rreth 0.65 për qind e votuesve dhe në Zveçan vetëm 1 për qind e votuesve. Në komunat e tjera me shumicë serbe në pjesën qendrore dhe atë jugore të Kosovës, sipas KQZ-së, numri i votuesve është më i madh.

Kryetarja e KQZ-së, Valdete Daka, tha se procesi po zhvillohet normalisht dhe pa ndonjë incident, por pranoi se në orët e hershme të mëngjesit ka patur probleme të natyrave teknike në disa nga qendrat e votimit.

Siç njofton korrespondenti i BBC-së në Prishtinë, vendvotimet në veri janë hapur kryesisht në zonat me popullatë të përzier, përfshirë Lagjen e Boshnjakëve dhe Tre Rrokaqiejt, ku banojnë shumica shqiptare.

Ekipet e lëvizshme në komunat e tjera në veri, thuhet të jenë hapur në vendbanime jashtë qendrave komunale. Në përgjithësi serbët e veriut të Kosovës i kanë bojkotuar zgjedhjet e përgjithshme të parakohshme në vend, duke i cilësuar ato si zgjedhje të një shteti për ta të paligjshëm.

Bashkimi Evropian ka thënë se këto zgjedhje janë hap i rëndësishëm drejt integrimit të vendit në BE.

Komisioni Qendror i Zgjedhjeve ka konfirmuar se janë 1 milion e 600 mijë qytetarë në Kosovë me të drejtë vote, nga të cilët mbi 73 mijë janë votues të rinj.

Autoritetet e sigurisë në vend kanë deklaruar se kanë shtuar masat e sigurisë për të mundësuar mbarëvajtjen e zgjedhjeve.

Policia e Kosovës thuhet se do të jetë përgjegjëse për sigurinë, por ajo do të ndihmohet nga Misioni Evropian për Rendin dhe Ligjin dhe, në rast të veçantë, edhe nga forcat paqeruajtëse të NATO-s.

Zgjedhjet e 12 dhjetorit vëzhgohen nga më shumë se 32 mijë vëzhgues nga të cilët afro 500 janë vëzhgues ndërkombëtarë.

Përveç një misioni të Rrjetit Evropian për Vëzhgimin e Zgjedhjeve (ENEMO), edhe një delegacion i Parlamentit Evropian do të vëzhgojë nga afër zgjedhjet e së dielës.

Kuvendi i Kosovës numëron 120 vende, nga të cilat 20 janë të ndara për pakicën serbe dhe pakicat e tjera.

Numri i përgjithshëm i kandidatëve të partive politike që do të garojnë për Kuvendin e Kosovës është 1265.

 
 
LOKALE
GJITHASHTU
 
 
Dërgoja një miku   Version i printueshëm
 
 
 
BBC ©
 
^^ Kthehu në krye
 
  Arkiv
 
  BBC News >> | BBC Sport >> | BBC Weather >> | BBC World Service >> | BBC Languages >>