Besimtarët myslimanë kërkojnë një xhami më të madhe në qendër.

Në Shqipëri, Kosovë, Maqedoni, Mal të Zi e gjetkë, besimtarët myslimanë kanë falur namazin.

Pas një muaji agjërim të lodhshëm, për shkak të temperaturave të larta që shoqëruan ditët e Ramazanit, besimtarët muslimanë e falën namazin e ditës së Bajramit në Bulevardin “Dëshmorët e Kombit”, përballë dhe brenda parkut “Rinia”.

Krerët e komunitetit mysliman në Tiranë vendosën ta kryejnë ritin në bulevard, për shkak të punimeve në sheshin “Skënderbej”.

Numri i konsiderueshëm i besimtarëve në bulevard dhe park dëshmoi edhe njëherë nevojën se, ashtu si besimtarët katolikë dhe ortodoksë në Tiranë që kanë tani nga një objekt kulti me përmasa të mëdha, edhe besimtarët muslimanë e duan një xhami të madhe afër qendrës së Tiranës.

Autoritetet në Tiranë e kanë përkrahur kërkesën e tyre, mirëpo problemi ka të bëjë me çështjet e pronës dhe planit urbanistik të kryeqytetit.

Në qindra xhami, në Shqipëri, Kosovë e gjetkë, bashkë me besimtarët myslimanë, u lutën për paqe dhe vëllazërim edhe krerë të lartë të fesë e të shtetit.