Ky është ndër nënvizimet kryesore në raportin vjetor të paraqitur në Vjenë nga ambasadori në largim, Robert Bosch.

Raporti i paraqitur nga zoti Bosch, përban tone mjaftë kritike. Sipas tij klasa politike shqiptare është treguar e paaftë për gjetjen e një konsensusi për të zgjidhur mosmarrëveshjet.

Pas 20 viteve të gjata tranzicioni, shënon raporti i OSBE, publiku shqiptar pret që udhëheqësit e tij politikë t’i japin fund kapitullit të zgjedhjeve të kontestuara.

Ai shpreh shqetësimin për mosfillimin e punës për reformën zgjedhore bazuar në rekomandimet e raportit të fundit të OSBE/ODIHR-it, e cila duhet të përfundojë 6 muaj para zgjedhjeve lokale të planifikuara për 8 maj te vitit 2011.

Në nënvizimet e tjera në raport është pavarësia e pushtetit gjyqësor e cila, sipas OSBE-së, vazhdon të mbetet një sfidë.

Sipas tij, "gjyqësori ka qenë shpesh nën presionin e ndërhyrjeve nga jashtë... dhe ka munguar transparencë në emërimet dhe transferimet e gjyqtarëve.”

Në raportin e OSBE-së, i tërhiqet vëmendja opozitës se me bojkotin e saj po pengon miratimin e ligjeve shumë të rëndësishme në sistemin gjyqësor që kërkojnë shumicën e cilësuar.

Ndërkaq lidhur me disa ligje të pritshme si ai i dosjeve, OSBE kërkon që ai të jetë në përputhje me standardet ndërkombëtare dhe kushtetutën e Shqipërisë, ndërsa pret të shikojë ndryshimet në ligjin për shërbimin inteligjent, varianti i parë i të cilit rriste mbikqyrjen e qeverisë mbi këtë shërbim.

Raporti vjetor i OSBE-së për Shqipërinë shprehet se gjendja e medias është shqetësuese përsa i përket burimeve financiare dhe transparencës në tregun mediatik.

Përsa i përket luftës kundër korrupsionit raporti e cilëson si një përparësi kryesore kombëtare, ndërsa nënvizon kritikat në adresë të veprimtarisë së prokurorisë.