Kryetari i opozitës tha se “ka rritje të papunësisë në vend, rritje të kredive të këqija dhe se borxhi publik në tetë vitet e fundit është dyfishuar”.

Sipas Ramës “ka rritje të eksporteve, por nuk ka zhvillim”. Duke u ndalur në të ardhurat e sezonit të sivjetëm turistik Rama pranoi se ka bum turistik, por sipas tij “ky bum turistik nuk solli rritje të punësimit”.

Më pas kreu i opozitës foli dhe për rrogat dhe pensionet që, sipas tij, janë të papërfillshme.

Lidhur me projektbuxhetin e vitit të ardhshëm që kryeministri Sali Berisha e ka konsideruar historik, kreu i opozitës renditi një sërë plagësh sociale dhe fenomenin e korrupsionit.

Duke u ndalur në akuzat e fundit që opozita ka bërë në drejtim të disa eksponentëve të PD-së dhe qeverisë, Rama tha se opozita është e gatshme të ballafaqohet “në çdo instancë të sistemit të drejtësisë për koncensionet e dhëna nga qeveria në fushën e naftës, dhe të koncensionëve të dhëna pa asnjë kriter dhe standart demokratik për tërë lumenjtë dhe burimet e energjisë hidrike të Shqipërisë".

Korrespondenti i BBC-së në Tiranë njofton se kryetari i PS-së, Edi Rama, është akuzuar më parë nga eksponentë të PD-së për korrupsion në dhënien e lejeve të ndërtimit, por ai konsideroi ato shpifje.

Më parë qeveria ka deklaruar se vendi po shënon hapa të mëdhenj të zhvillimit ekonomik.

Kryeministri shqiptar, Sali Berisha, e ka konsideruar projektbuxhetin për vitin 2011 si “buxhetin më të madh në historinë e vendit, ku prioritet do të kenë investimet në infrastruktrë, turizëm dhe në projektin ‘Shqipëria dixhtale. “