Jonuz Hallaçi BBC Morin, Kukës

	Shefat e policisë së Kosovës dhe Shqipërisë nënëshkruajnë marrëveshje për kufirin

Në një anë të rrugës dhe në patrullime të bie në sy se patrullat e policisë rrugore janë të përbashkëta, me pjesëtarë të policisë së Kosovës dhe Shqipërisë.

Për herë të parë policia e Kosovës arrin të kryejë shërbime provizore jashtë Kosovës dhe kjo vlerësohet si një tregues i besimit dhe sigurisë për udhëtarët nga Kosova, por dhe Shqipëria.

"Policia na ka pritur shumë mirë, në rrugë ka më shumë siguri, sidomos për ne që vijmë nga Kosova," thotë një pushues nga Gjakova.

"Sivjet me rrugën e re dhe me sigurinë që është do të ketë edhe më shumë pushues nga Kosova për në Shqipëri," parashikon ai.

"Është shumë mirë edhe për kosovarët që të shohin në rrugët tona patrulla të përbashkëta mes dy policive," thotë një shofer nga Kukësi.

"Është një siguri më shumë si për ne ashtu dhe për shqiptarët e Kosovës," shton ai.

Marrëveshja për kufirin

Marrëveshja është nënshkruar në pikëkalimin kufitar të Morinit, porta më e madhe lidhëse mes Shqipërisë dhe Kosovës dhe parashikon vetëm një kontroll në kufi dhe jo dy si më parë.

Gjatë verës kufiri do të kalohet me çdo lloj dokument identifikimi.

Memorandumi për patrullim të përbashkët të akseve rrugore mes dy policive, asaj të Kosovës dhe Shqipërisë, gjatë sezonit veror është vlerësuar nga ministrat e brendshëm të dy vendeve, jo vetëm si hap i madh bashkëpunimi, por dhe integrimi, ashtu siç veprohet në këto raste dhe në shumë vende të Bashkimit Evropian.

Ministëri i Brendshëm i Shqipërisë, Lulzim Basha, shpreh bindjen në suksesin e këtij bashkëpunimi, duke falenderuar dhe qeverinë e Kosovës për gatishmërinë e treguar.

"Kjo do të përmirësojë cilësinë dhe transparencën e këtij shërbimi, duke ulur në minimum ankesat e qytetarëve dhe duke shtuar në maksimum sigurinë e lëvizjeve të tyre dhe kënaqësinë e pranisë së tyre gjatë sezonit turistik, në territorin e Republikës së Shqipërisë," thotël zoti Basha.

Homologu i tij kosovar, Bajram Rexhepi, thotë se memorandumi i bashkëpunimit "është në vazhdën e bashkëpunimit të madh ndërinstitucional në mes të dy shteteve".

"Ne jemi në procesin e lëvizjes së lirë dhe të lëhtësimit të kalimit të kufirit," thotë zoti Rexhepi.

"Patrullat e përbashkëta në trafikun rrugor do të parandalojnë aksidentet që nuk kanë munguar dhe do të rrisin besimin e udhëtarëve," thotë zoti Rexhepi.

Sipas pikave të memorandumit patrullimet e përbashkëta do të jenë deri në fund të sezonit turistik dhe do të shtrihen në të gjitha rrugët nacionale të Shqipërisë, sidomos në ato që të çojnë drejt pikave turistike.

Shqipëria si vend pritës do të paguajë gjithë shpenzimet dhe akomodimin e policëve nga Kosova.

Hapja e tunelit të Kalimashit dhe vënia në punë e autostradës nga Morini drejt Durrësit do t’i sjellë pushuesit nga Kosova për tre orë në bregdetin e Durrësit.

Sivjet, sipas të dhënave që ka policia kufitare dhe agjencitë turistike, pritet që të shënohet numri më i madh i pushuesve nga Kosova në brigjet shqiptare.

Gjatë vitit të kaluar afro gjysëm milioni pushues kaluan pushimet në brigjet e Jonit dhe Adriatikut.

Dëgjoni diskutimin