Pritet përfundimi i numërimit të votave

Pas votimit, Partia Demokratike e Kosovës e kryeministrit Hashim Thaçi, ka shpallur fitoren në 20 komuna të kosovës.

Të dielën në mbrëmje në këtë parti festohej ndërkohë vetë zoti Thaçi tha se kjo ishte një fitore për të gjithë:

"Shteti i Kosovës e dha provimin e demokracisë me zotimin për të ardhmen integruese euroatlantike", tha z. Thaçi.

Të kënaqur nga votimi janë edhe nga Lidhja Demokratike e Kosovës. Nënkryetari i kësaj partie Lutfi Haziri bëri të ditura rezultatet, duke thënë se partia e tij ka fituar në Prishtinë:

"Mbështetja e madhe që iu dha në Prishtinë LDK-së dhe në katër komuna, tregon se vizioni jonë është mbështur nga pjesa dërmuese e popullatës,"- tha z. Haziri.

Pas zgjedhjeve lokale, të kënaqura me rezultate e arritura shprehen edhe subjektet e tjera politike. Aleanca për Ardhmërinë e Kosovës thotë se ka arriturr rritje në përkrahje. Lidhja Demokratike e Dardanisë, e cila ishte në koalicion me Aleancën Kosova e Re, thotë se pas këtyre zgjehdjeve ka përforcuar pozicionet e veta.

Komisioni Qendror i Zgjedhjeve ndërkohë ka bërë publike rezultatet të pjeshme, të një numri të vogël të komunave. Gjatë ditës do të duhet që të konfirmojë rezultatet që dhanë subjektet politike.

Korrespondenti i BBC-së në Prishtinë citonë vëzhgues të kenë thënë se zgjedhjet e së dielës mund të vlerësohen si një arritje e madhe, pavarësisht rezultateve, për vetë popullin e kosovës.

Zgjedhjet lokale në Kosovë, të parat të organizuara nga autoritetet vendore pas shpalljes së pavarsisë, vlerësohet sepërgjithësisht u zhvilluan të qeta. KQZ-ja tha se ato përmbushën standardet ndërkombëtare.

Incidentet e vogla që kanë ndodhur, nga KQZ, nuk konsiderohen të një rëndësie të madhe për të cënuar kredibilitetin e procesit zgjedhor.

"Të gjitha përgatitjet u bënë që zgjedhjet të ishin të lira, demokratike dhe në harmoni me standardet e larta ndërkombëtare dhe ne shpresojmë se kjo është arritur,"- tha pas mbylljes së vendvotimeve Nesrin Lushta, kryetare e KQZ-së.

KQZ tha se 45 për qind e elektoratit doli në votime, që është më shumë se në zgjedhjet e klauara.

Gjatë ditës pritet shpallja e rezultateve, por edhe rapori i misionit vëzhgues ndërkombëtar ENEMO.

Reagimet në Beograd

Ministri serb për Kosovën në Qeverinë në Beograd, Goran Bogdanoviq, duke i cilësuar zgjedhjet lokale në Kosovë, si jolegale, ka vlerësuar se në to ka dalë një numër i vogël serbësh dhe, sipas tij, pjesa dërmuese e tyre ka respektuar qëndrimin e Qeverisë së Serbisë se nuk ka kushte për pjesëmarrjen e tyre në këto zgjedhje.

"Tani të gjithë e kanë të qartë se komuniteti serb nuk dëshiroi të pranojë rolin paraprakisht të përcaktuar që të jetë ai që t'u japë legjitimitet zgjedhjeve të jashtëligjshme"- thuhet në një komunikatë të ministrit serb Bogdanoviq.

Mirëpo, për dallim prej tij, media elektronike dhe ajo e shkruar në Beograd kanë raportuar për një pjesëmarrje të dukshme të serbëve në Graçanicë, Ranillug dhe Kllokot, ndërsa simbolike ka qenë jehona nëpër komunat në veri të Kosovës - Leposaviq, Zubin Potok dhe Zveçan.

Në të njëtjën kohë, Televizioni shtetëror i Serbisë njoftoi se të dielën në Graçanicë, për mungesë të kuorumit, ishte anuluar një mbledhje e Komisionit parlamentar të Kuvendit të Serbisë me qëllim të mbështetjes së serbëve të mos dalin në zgjedhje.