Këshilli i BE-së kërkon mendimin e KE-së për aplikimin e Shqipërisë

Siç njofton gazetari shqiptar në Bruksel Augustin Palokaj, ministrat e Jashtëm të BE-së, pa diskutim, miratuan vendimin e përgatitur që më parë nga presidenca suedeze e BE-së që mandatin për përpilimin e vlerësimit të aplikacionit të Shqipërisë t'ia kalojnë Komisionit Evropian.

Vendim u bë i mundur pasi asnjë shtet nuk pati ndonjë kundërshtim në takimin e Ministrave të Jashtëm të BE-së në Bruksel.

Tani pritet që Komisioni Evropian të fillojë punën, t'i dërgojë Shqipërisë një pyetësor dhe në një periudhë prej përafërsisht një viti, të bëhet përpilimi i mendimit të KE-së.

Nëse mendimi do të jetë pozitiv, atëherë çështja kthehet përsëri tek shtetet anëtare të BE-së të cilat do të vendosin për t'i dhënë apo jo Shqipërisë statusin e vendit kandidat dhe për të nisur negociatat e anëtarësimit.

Sipas BE-së, ky është një hap shumë i rëndësishëm i Shqipërisë në procesin e afrimit me institucionet e Bashkimit Evropian, përfundon Auagustin Palokaj.