Avari në tunelin e Kalimashit

Deputetët socialistë kërkuan shpjegime nga përfaqësuesit e firmës ndërtuese Bektel - Enka të cilët bënë të ditur se për momentin po punohej për të riparuar dëmet.

Ata thanë se vepra pritet të jetë gati në verën e vitit të ardhshëm.

Deputeti socialist, Namik Dokle tha gjatë vizitës se gjithshka ka ndodhur për shkak të nxitimit të qeverisë, e cila e përdori këtë vepër për qëllime elektorale.

Ministri i Transporteve, Sokol Olldashi e përshëndeti vizitën e deputetëve socialistë, por shtoi se hapi i tyre ishte i vonuar.

Rruga Durrës-Kukës-Morinë është vepra më e madhe e infrastrukturës rrugore në Shqipëri.

Ndërtimi i saj, që ka filluar dy vjet më parë, është bërë mes polemikash për koston e saj të lartë dhe dyshimeve të hedhura për afera korruptive nga segmente të qeverisë së kryeministrit Sali Berisha, akuza këto që kundërshtohen.

Një pjesë e veprës, përfshirë dhe tunelin Thirrë-Kalimash u inagurua në prag të zgjedhjeve të 28 qershorit, por më vonë tuneli u mbyll për shkak të rreziqeve që paraqiste.