Aleksandër Furxhi BBC Tiranë

	Opozita po bojkoton parlamentin që pas zgjedhjeve të fundit

PS me aleatët e saj të majtë dhe të djathtë ka organizuar protestë në qytetin e Korçës, si pjesë e strategjisë së denoncimit, sipas opozitës, të parregullsive dhe manipulimit të zgjedhjeve të qershorit.

Ky ishte manifestimi i pestë i organizuar nga opozita, ku një ndër oratorët më aktivë kundër qeverisë së kryeministrit Sali Berisha është ish-i burgosuri politik dhe një kohë bashkëpunëtor i zotit Berisha, Spartak Ngjela.

Në këto protesta, opozita dhe aleatët e saj po përpiqen të argumentojnë se pushteti është i frikësuar nga hapja e kutive të votimit.

Hapja e kutive të votimit

Hapja e kutive është kërkesa kryesore e opozitës e cila thotë se beson se brenda kutive fshihet e vërteta e vullnetit të shprehur nga zgjedhësit.

Domethënë opozita në këtë fushatë kërkon të thotë se rezultati i shpallur i zgjedhjeve është i ndryshëm nga ai që do të tregonin dokumentet zgjedhore të mbyllura në kutitë e votimit.

Qeveria i është përgjigjur që në fillim kësaj kërkese me ftesën për opozitën që të zerë vendet që i takojnë, sipas rezultatit të shpallur, në parlament dhe le të hetohet për zgjedhjet.

Por qeveria nënvizon se nuk mund të pranojë kërkesa anti ligjore. Si të tillë qeveria konsideron vënien nën hetim të vendimeve të kolegjit zgjedhor, lidhur me zgjedhjet.

Qeveria dhe opozita nuk kanë lëvizur prej këtyre pozitave që prej më shumë se dy muaj tashmë.

Faktori ndërkombëtar ka ndërhyrë në mënyrë diplomatike duke përcjellë qartë mesazhin se opozita duhet ta braktisë protestën e rrugës dhe të angazhohet në dialogun apo betejën politike brenda parlamentit.

Por bojkoti i parlamentit nga opozita vazhdon dhe kjo situatë ka krijuar pengesa në funksionimin normal të hallkave të shtetit dhe qeverisjes.

Ndikimi mbi sistemin e drejtësisë

Sistemi i drejtësisë duket më i prekuri në këtë drejtim. Autoritetet e drejtësisë kanë hyrë në një debat lidhur me mënyrën e zëvendësimit të disa anëtarëve të këshillit të lartë të drejtësisë, të cilëve u ka mbaruar mandati.

Ligji përkatës, ai i funksionimit të konferencës gjyqësore, organit që i zgjedh anëtarët e këshillit të lartë të drejtësisë, është i pezulluar nga gjykata kushtetuese.

Një pjesë e gjyqtarëve propozojnë që konferenca të vetëadministrohet deri sa të bëhet një ligj i ri. Por ligji i ri kërkon votat e opozitës.

Një pjesë tjetër kundërshton këtë zgjidhje që anashkalon ligjin që duhet të miratohet. Debati duket se është futur në një rrugë pa krye.

Ministri i drejtësisë, Bujar Nishani ka pohuar se reforma gjyqësore është e bllokuar. Të paktën 5 ligje të rëndësishme pjesë e kësaj reforme, nuk mund të miratohen pa votat e deputetëve të opozitës.

Situata nuk është normale dhe kjo po theksohet sa më shumë kalon koha. Gazetari Lorenc Vangjeli për BBC thotë:

"Për momentin vetëm një gjë besoj se është e sigurtë- Shqipëria ndodhet në krizë. Një shoqëri demokratike aq më tepër një shoqëri e brishtë si e jona nuk mund t’i lejojë vetes luksin që të zhvillojë kaq gjatë jetën e saj institucionale pa opozitën ose përkthyer ndryshe pa pjesmarrjen e gjysmës së popullsisë së vendit, të publikut shqiptar në qeverisje. Kjo nuk është një gjëndje normale, është një gjëndje e padurueshme do të thosha dhe do të ishte mirë të mbaronte një orë e më parë."

Situatë jo normale që po përkeqësohet sheh edhe gazetari Lutfi Dervishi:

"Situata e tanishme nuk flet për një normalitet politik, flet për një normalitet institucional, nuk flet edhe për një normalitet social edhe për të ardhmen. Së pari gjysma e parlamentit është bosh. Të kujton më tepër një grup parlamentar të një partie sesa një parlament apo institucion ku debatohet dhe miratohen ligje. Ne pamë se fundmi që dhe pushteti gjyqësor mund të paralizohet për shkak të gjysmës bosh të parlamentit, sepse ligjet për gjyqësorin në mënyrë që të funksionoj sistemi i drejtësisë kërkojnë një votim të cilësuar prej 3/5."

Mbushen tashmë 2 muaj nga dita e formimit të qeverisë dhe po aq nga nisja e bojkotit të parlamentit nga opozita. Pra një nga mekanizmat kyç të demokracisë është praktikisht në kolaps. Dhe sot për sot nuk shihen shenja të ndryshimit të tendencës. Lutfi Dervishi thotë:

"Prognoza në këto situata është e errët dhe e zymtë do të thoja, ç‘ka do të thotë që ne presim më shumë polarizim politik, më tepër tensionim politik, më tepër akuza politike ose një ping-pong akuzash nga pozita dhe opozita dhe druaj se jemi në një situatë të pafavorshme e do duhet patjetër të gjendet një rrugë për të kthyer normalitetin në vend."

Po pse të mos hapen kutitë dhe të merret vesh se ç‘ka brenda tyre pyesin më së shumti ata që politika nuk u intereson drejtpërdrejt, por që shqetësohen se përse jeta politike dhe publike është e mbushur më kaq konfliktualitet. Por, natyrisht, nuk është një operacion i thjeshtë. Gazetari Lorenc Vangjeli:

"Palët duhet të ulen sa më parë. Çështja tek kutitë ka dy zgjidhje të mos hapen dhe historia të vazhdojë edhe më tej kështu siç jemi në krizë, apo të hapen dhe të shikojmë si është e vërteta që ndodhin ato. Gjithë pjesa tjetër është diskutim proçedure. Këtu bëhet fjalë për një sfidë të së vërtetës, për një sfidë qytetare ndaj asaj çfarë ka ndodhur. Është e drejta më normale dhe më minimale e mundshme për të ditur se ç‘ka ndodhur. Të mendojmë një çast të kundërtën e asaj që mendon opozita, pra hapen kutitë dhe nuk ka asgjë të parregullt në to. Atëhere do të shikonim që kjo ishte një sfidë e zhbërë dhe Shqipëria do të vazhdonte qetësisht rrugën e saj drejt zhvillimit."

Hapja e kutive do ta vinte në pozitë të vështirë njërën prej palëve. Nëse nuk do të kishte kurrfarë parregullsie, opozita do të ulte kokën dhe do të merrte rrugën pa zë drejt parlamentit.

Por, në rastin e kundërt, qeveria nuk do ta bënte gjumin e qetë përballë një opozite të armatosur me një argument shumë të fortë: mashtrimin elektoral.

Ja përse është në pikëpyetje se deri kur dhe si do të zgjidhet ajo që tashmë është me plot gojën një krizë politike në Shqipëri.