A do të dalin serbët në zgjedhje?

Zonja Trajkoviq vlerësoi se serbët e Kosovës kanë nevojë të fitojnë një udhëheqësi që do të jetë e pranuar dhe që do të vendos kushtet për Beogradin, Prishtinën dhe bashkësinë ndërkombëtare, që sipas saj, do të ishte në funksion të mbrojtjes së serbëve dhe të interesave të tyre.

Ajo akuzoi një pjesë të udhëheqjes së serbëve të Kosovës dhe Beogradin zyrtar për një, siç e quajti, fushatë kundër zgjedhjeve lokale në Kosovë.

Arbër Vllahiu bisedoi me zonjën Trajkoviq dhe fillimisht e pyeti nëse zgjedhjet lokale në kosovë janë vërtetë një udhëkryq për serbët e Kosovës?

Trajkoviq: Fillimisht mendoj se serbëve në hapësirat e Kosovës u duhet një institucionalizim i njohur ndërkombëtarisht që do të jetë legjitim dhe ligjor. Dhe, gjithashtu u duhen proceset politike brenda vetë bashkësisë serbe.

Me siguri se kemi një monopol të një grupi të caktuar të njerëzve që nuk ka kaluar përmes një cikli zgjedhor që nënkupton zgjedhje në gjithë hapësirën e Kosovës dhe askush nga ne nuk ka të drejtë të flas në emër të bashkësisë serbe në një mënyrë ligjore, legjitime dhe në një mënyrë institucionale të pranuar edhe nga bashkësia ndërkombëtare, por edhe nga institicucionet në Prishtinë dhe Beograd.

Ne kemi nevojë të fitojmë udhëheqësi që do të jetë e pranuar dhe që do të vendos kushtet e saj edhe për Beogradin, edhe për Prishtinën por edhe bashkësinë ndërkombëtare e që do të ishte në funksion të mbrojtjes së serbëve dhe të interesave të tyre për mbijetesë në këto hapësira.

Në këtë rrafsh, mendoj se zgjedhjet janë shumë të dëshirueshme dhe në të kundërtën frikësohem dhe në të vërtetë krejt kjo më përkujton një kohë para zgjedhjeve në Republikën Serbe të Krainës, kur shkoninn njerëzit nga Beogradi të mbanin mitingje, ku flisnin se nëse dilni në zgjedhje do të humbni Beogradin.

Serbët e Kosovës nuk duan të ndahen nga Beogradi dhe ai nuk ka të drejtë të heqë dorë nga serbët.

Mendoj se një fushatë e hapjes së mediave në Beograd do të ishte e mirëseardhur që të paraqitet në një mënyrë të mençur dhe demokratike përcaktimi i serbëve dhe lobimi për daljen e serbëve në zgjedhje.

BBC: A mundet që kjo ndarje në mes vetë serbëve të ketë ndikim në pjesëmarrjen e tyre në zgjedhje?

Trajkoviq: Aktualisht dhe për fat të keq fushata më e madhe vjen nga udhëheqësit e vetëqeverisjes lokale që kanë dalë nga zgjedhjet serbe në të gjitha nivelet.

Mendoj këtu edhe për ata në veri dhe për ata që ndodhen në enklava.

Ata po bëjnë presion, që të mos them respresion, mbi popullatën, po përhapin dezinformata dhe po zhvillojnë fushatë që në thelb ka për qëllim ruajtjen e privilegjeve të tyre përmes përkrahjes së Beogradit për këto institucione jofunksionale, kurse në anën tjetër po e mbysin idenë se këto zgjedhje vërtetë paraqesin një rast për mbijetesë të serbëve në hapësirat e Kosovës. Në të kundërtën, kam frikë se serbët do të detyrohen të ikin.

BBC: KQZ-ja ka paralajmëruar hapjen e vendvotimeve alternative për vendbanimet serbe në rast të pengesave. A flet kjo për një lloj pengese që strukturat paralele do të mund të bënin për vendvotimet legjitime?

Trajkoviq: Krejt varet nga vendimi i Beogradit.

Nëse Beogradi iu thotë institucioneve të caktuara, si janë shkollat, që kryesisht kanë qenë vende për votime, se nuk mund të dilet, atëherë me siguri do të jetë ky rasti i vetëm që serbët të dëshmojnë vullnetin e tyre demokratik, e që unë nuk do të doja.

Nga ana tjetër po krijohet një mundësi që për mua është e pranuar që ndoshta serbët të mos votojnë në vendet e tyre nga frika se fqinjët mund t'i paraqesin dhe me siguri se do të ketë njerëz kujdestarë që merren me hartimin e listave dhe që luajnë rolin e njerëzve të shërbimeve të caktuara që do të ofrojnë emrat e njerëzve, të cilët do të dalin në vendvotime.

Kjo për një pjesë të njerëzve paraqet frikë dhe në fakt kjo është një ide e mirë.