Ministri Bryant tha se i jep mbështetje të fuqishme ambicieve evropiane të Kosovës

Pas një takimi në Ministrinë e Jashtme britanike (Foreign Office), presidenti Sejdiu tha se krahas falënderimit për mbështetjen të cilën Mbretëria e Bashkuar i jep Kosovës, ka shtruar edhe çështjen e nxitjes se vendeve të ndryshme për të njohur Republikën e Kosovës, aspekte që kanë të bëjnë me procesin e integrimeve të të gjithë rajonit dhe marrjes së një 'skeme të detajuar apo udhëzuesi' për vetë Kosovën dhe në procesin e liebralizimit.

Presidenti Sejdiu tha se ka shtruar edhe nevojën që ka Kosova për mbështetje të vazhdueshme nga Bashkimi Evropian dhe Mbretëria e Bashkuar për zhvillimin ekonomik të vendit.

Në një intervistë për BBC-në, presidenti Sejdiu tha se takimi në Foreign Office "ishte një konfirmim i qartë i asaj që kemi dëgjuar nga kryeministri Gordon Brown dhe sekretari i Jashtëm, David Milliband se Mbretëria e Bashkuar mbetet një nga partnerët më të rëndësishëm të Republikës së Kosovës duke qenë faktor ndihmëtar edhe në shumë procese të tjera."

Ministri për Europë, Chris Bryant e përgëzoi Presidentin Sejdiu për përfundimin, siç e quajti, të suksesshëm të demarkacionit të kufirit midis Maqedonisë dhe Kosovës dhe theksoi dëshirën e Britanisë së Madhe për "zgjedhje të lira e të ndershme lokale në Kosovë, me pjesmarrjen e të gjitha komuniteteve".

Në takimin në Foreign Office u diskutua edhe për Raportin e Progresit të Komisionit Evropian dhe Studimin për Kosovën. Në një njoftim për media, zoti Bryant tha se i jep mbështetjen e tij të fuqishme ambicieve evropiane të Kosovës.

Presidenti Sejdiu në mbrëmje është i ftuar për të mbajtur ligjëratë në Oxford Union, shoqëri prestigjioze debatuese në Universitetin e Oksfordit.