Violeta Hyseni BBC - Prishtinë

	Të premten përfundon afati për dorëzimin e dokumenteve shtesë

Gjykata iu dha afat 3 muaj të gjitha palëve të përfshira në këtë proces që të kontestojnë argumentet e paraqitura nga pjesëmarrësit e tjerë.

Mbi 30 vende kanë deponuar qëndrimet e tyre në mbështetje apo në kundërshtim të pavarësisë së Kosovës.

Numri më i madh i tyre kanë hedhur poshtë pretendimet e Serbisë se shpallja e pavarësisë ishte në kundërshtim me të drejtën ndërkombëtare.

Argumentet shtesë të Prishtinës që i dorëzohen Gjykatës Ndërkombëtare të Drejtësisë janë përmbledhur në një dokument prej 150 faqesh, të përgatitur nga përfaqësuesi ligjor i Kosovës, Michael Wood.

Zëvendëskryeministri i Kosovës, Ramë Manaj, i tha BBC-së se beson që pas deponimit të materialeve shtesë, Prishina do të arrijë t’i bindë më shumë shtete se shpallja e pavarësisë së Kosovës ka qenë në pajtim me të drejtën ndërkombëtare.

“Bëhet fjalë për ato argumente madhore, për ato fakte relevante, të cilat janë kontestuar nga ato vende që nuk kanë përkrahur pavarësinë e vendit tonë. Pra, janë argumente që refuzojnë pretendimet e vendeve që kanë dalë përkrah Serbisë dhe kërkesës së saj për të kontestuar pavarësinë e Kosovës. Besojmë se argumentet tona janë fuqiplota që të rrëzojnë pretendimet e pabazuara të atyre vendeve që kontestojnë pavarësinë e vendit tonë”, tha për BBC-në zoti Manaj.

Opozita në Prishtinë është shprehur e shqetësuar për nivelin e përgatitjes së qeverisë për ta mbrojtur ligjshmërinë e pavarësisë së Kosovës në Gjykatën Ndërkombëtare të Drejtësisë.

Burim Ramadani është sekretar i përgjithshëm i Aleancës për Ardhmërinë e Kosovës.

“Ne nuk kemi asnjë informacion të vetëm për nivelin e përgatitjeve të Kosovës, këtu konsiston shqetësimi ynë sepse vlerësojmë se me fitoren apo humbjen e rastit, nuk humb apo nuk fiton një parti apo një individ, por e tërë Kosova. Ky rast është shumë i ndjeshëm për Kosovën në këtë kohë, prandaj ne si parti opozitare i jemi ofruar qeverisë për t’i dhënë kapacitetet tona intelektuale dhe profesionale për të ndihmuar në përgatitjen e argumenteve për Gjykatën Ndërkombëtare të Drejtësisë, por kjo natyrisht nuk ka ndodhur”, deklaroi zoti Ramadani.

Beogradi zyrtar, i cili ka dorëzuar këtë javë në Hagë dokumentet plotësuese në kundërshtim të pavarësisë së Kosovës, beson se do të ketë sukses në kontestimin e argumenteve të paraqitura nga palët që e mbështetin shtetësinë e Kosovës.

Ministri i Jashtëm serb, Vuk Jeremiq, është shprehur se beson që Gjykata do të gjykojë në favor të Serbisë dhe pas kësaj Beogradi do të mund të ndalë numrin e njohjeve të pavarësisë së Kosovës.

Ndërkohë, presidenti i Serbisë, Boris Tadiq, ka shfrytëzuar konferencën e shteteve të painkuadruara në Egjipt që të bëjë thirrje për mosnjohjen e pavarësisë së Kosovës deri në vendimin e Gjykatës Ndërkombëtare të Drejtësisë.

Kjo gjykatë pritet që më 1 dhjetor të fillojë seancat dëgjimore për rastin e Kosovës dhe opinioni i saj nuk do të ketë karakter vendimmarrës, por vetëm këshillëdhënës.

Analistët thonë se pavarësisht nga mendimi që do të japë kjo gjykatë, pavarësia e Kosovës është një realitet i kohës dhe ajo nuk mund të zhbëhet.

Kosova, shtet i pavarur dhe sovran, është njohur deri tani nga 62 shtete anëtare të OKB-së.