Fatos Ahmati BBC, Tiranë

Ndërsa maxhoranca thotë se ka bërë hapa përpara drejt këtij liberalizimi, opozita këmbëngul se qeveria ka dështuar. Ditët e fundit rreth kësaj çështjeje ka patur mjaftë zhvillime në kancelaritë europiane.

Në një mbledhje të zhvilluar të hënën ministrat e Jashtëm të BE kanë mbështetur procesin e liberalizimit të vizave për vendet e Ballkanit Perendimor. Këshilli i Ministrave ka inkurajuar Komisionin Europian që të paraqes sa më shpejtë propozimet në mënyrë që brenda vitit 2009 liberalizimi të realizohet me vendet që do të arrijnë të përmbushin kërkesat deri në fund.

Vendet e diskutuar janë Shqipëria, Bosnjë-Hercegovina, Maqedonia, Mali i Zi dhe Serbia. Megjithatë, jo të gjitha vendet kanë bërë progresin e nevojshëm.

Në Tiranë forcat politike i kanë lexuar përfundimet e kësaj mbledhjeje në mënyra të ndryshme, ndonëse deklaratat zyrtare nga selite e tyre ende mungojnë.

Në gazetat e ditës të afërta me maxhorancën, lexohet se “BE i ka thënë po liberalizimit të vizave me Shqipërinë”, ndërsa gazetat e opozitës shkruajnë se “Shqipëria nuk i ka përmbushur standartet”.

Megjithatë, shumëkush në Shqipëri mendon se nga mënyra se si do të zhvillohen zgjedhjet parlamentare të 28 qershorit do të varet shumë edhe e ardhmja e ëndrrës shumëvjeçare të shqiptarëve për lëvizjen e lirë në Europë. Kjo përforcohet edhe nga deklaratat e krerëve kryesorë të politikës shqiptare, të cilët thonë të sigurt, se në vitin 2010, shqiptarët do të lëvizin lirisht pa viza në vendet e BE.