BBCAlbanian.com
 
Botuar: E enjte, 11 qershor 2009 - 11:39 CET
 
Dërgoja një miku   Version i printueshëm
Vlora: Dilemë mes turizmit dhe industrisë
 

 
 
Kanali i Motorit, Vlorë
Ndotja në kanalin e Motorit
Deti i Vlorës gdhiu i ndotur mëngjesin e tre qershorit. Banorët e Plazhit të Vjetër kishin nuhatur erën e rëndë, ndërsa policia konstatoi se fjala ishte për solar të derdhur në det. Gjurmët duken edhe një javë pas.

Mbeturina të shumta nafte dhe vaji shohim në Kanalin e Motorit, i cili ka derdhje në det.

Ministri i Mjedisit Lefter Xhuveli bën thirrje për përgjegjshmëri.

"Mbetjet e naftës kanë ardhur në bregun e detit në brezin e rërës, dhe aty mundësia për ta pastruar është më e lehtë," thotë zoti Xhuveli.

"Çështja është që gjithë operatorët ekonomikë të tregohen më të përgjegjshëm, sepse sigurisht pasi ndodh një aksident si ky që ndodhi në gjirin e Vlorës ka edhe masa që ndërmerren".

Ashtu siç pritej, ngjarja ka ngjallur një reaksion të menjëhershëm të politikës, veçanërisht tashmë kur ajo është përfshirë në fushatat zgjedhore.

Bujar Leskaj, deputet i Partisë Demokratike në Vlorë, duke folur atë ditë për BBC-në, thotë se ai ishte "akt tejet i papërgjegjshëm".

"Është një akt që nuk e nderon qytetarinë vlonjate, është një akt që turpëron ata që e kanë ekzekutuar si veprim civil, joqytetar, jo në mbrojtje të mjedisit, por unë më tepër do të shprehesha se më shumë turpëruan ata që e kanë ideuar atë," tha zoti Leskaj.

Ka reaguar edhe kreu lokal socialist, Eltar Deda, i cili për BBC-në thotë se ai veprim ishte "një krim ndaj ambjentit".

"Për vlerësimin tonë, është quajtur një krim, krim ndaj ambjentit, krim edhe ndaj lirisë së çdo aktiviteti që zhvillohet në qytetin e Vlorës," thotë zoti Deda.

E megjithatë më së shumti janë qytetarët vlonjatë ata që debatojnë rreth këtyre ngjarjeve.

Një vlonjat tregon: "Unë kam vajtur e kam parë, jam vlonjat. Kjo u bë një neglizhencë shoferash, thjesht interes, u nisën për në Ballsh makinat, sa kam dëgjuar dhe interesuar dhe në Pus Mezin u kthyen, dhe në orën tre të mëngjezit e kanë derdhur atje. Ajo ishte solar dhe ujë, fundra dhe mbeturina të një vapori."

"Asgjë nuk pengon, madje fundi i fundit ajo u hodh tek kanali i Motorrit që quhet, dhe tek kanali i Motorrit gjithmonë janë hedhur mbeturina, dhe kjo është e kotë, bile për mua ata të dalin një sahat e më parë, se nuk ka asnjë lloj problemi, se ajo është për filtrim, për të gjitha."

Industritë e vjetra

Gërmadha e Sodës Kaustike
Relikja e industrisë, Uzina e Sodës Kaustike

Por debati për mjedisin nuk mbyllet vetëm me rastin e mësipërm. Vlora ka edhe ish- fabrikën e sodës akustike.

Dikur kjo fabrikë, rreth tre dekada më parë, ishte një nga emblemat e ekonomisë socialiste shqiptare, tashmë fabrika është kthyer në një gërmadhë të vërtetë.

"Megjithëse ka qenë një nga krenaritë e asaj kohe, fabrika ka ndotur ndjeshëm detin," thonë vlonjatët.

"Soda kaustike ka qenë një kaos. Gjithë acidi derdhej në mol të sodës. Ishte skandaloze se ne jemi edhe banorë të kësaj lagjeje, lagjes 24 maji, dhe zbardhej komplet deti nga kampi i pionerëve e deri te zona e Zvërnecit, që i themi ne, pa shkuar në Dajlan, zbardhej komplet, vetëm nga acidet dhe soda kaustike. Edhe zhivë mund të ketë patur në det," flet një mesoburrë me shikimin e tretur në gërmadhat që rikujtojnë të shkuarën jo aq të largët.

E pyes nëse ka lënë kjo sodë kaustike ndonjë pasojë tek njerëzit.

Tund kokën në shenjë pohimi: "Po, ata që jetojnë atje i kanë jetuar. Ngritën shtëpitë se erdhën nga rrethet e Shqipërisë, erdhën nga halli e u futën atje, ku zhvivë ka edhe sot".

Dhe vetëm pak kilometra larg sodës kaustike në Vlorë, tashmë është ndërtuar një impiant modern, është fjala për petroliferën italo-shqiptare, një investim disa milionë eurosh, këtu në gjirin e Vlorës.

Këtu do të depozitohen karburante të llojeve të ndryshme, të cilat do të kenë destinacion vende të ndryshme të Europës.

Vetëm pak ditë më parë, duke përuruar këtë impiant, kryeministri Sali Berisha tha se ai është një margaritar për gjirin e Vlorës, por edhe për ekonominë shqiptare.

Turizmi apo industria

Zona e Triportit
Gazetari i BBC-së Fatos Ahmati në zonën e Triportit

Nga vendi i quajtur Tri Porte këtu në Vlorë, shihet gati si në pëllëmbë të dorës Petrolifera italo-shqiptare, duken gërmadhat e sodës kaustike, duket porti i qytetit të Vlorës, plazhi qytetit, duket gjithashtu plazhi i bukur i Rradhimës dhe ai i Orikumit.

Mbi gadishullin e Karaburunit, pritet të ndërtohet një impiant i fuqishëm i prodhimit të energjisë nëpërmjet erës.

Dhe, vërtet kanë të drejtë vlonjatët kur thonë se nga shumë premtimet që po bëhen, duhet pritur. Shpresojnë të mos i marrë era...

Po çfarë thonë vlonjatët, cila është e ardhmja e Vlorës - turizmi, është zhvillimi i portit, mendohet të jetë një nga portet më të mëdhenj në Ballkan, apo edhe ndërtimi i termocentralit, i petroliferës?

"Do të bëhet shumë, shumë mirë. Mbi të gjitha do të zhvillohet punësimi. Të bëhemi të gjithë si Europa. Ke Brindizin, ke në çdo vend të botës ka petroliferë, ka TEC-e, ka të gjitha, dhe ju lumtë atyre që e kanë bërë këtë, për zvillimin e Vlorës," - thotë një burrë.

Por një mik i tij ka mendim tjetër:

"Çfarë të themi ne, zonë industriale, quhet zonë industriale, turizmi është turizëm. Janë të ndara. Asnjëherë nuk duhet të jenë bashkë. U ndërtua një petroliferë, u ndërtua një TEC. Ato u ndërtuan, janë parashikuar.

"Nuk e di, për turizmin është e dëmshme, për turzmin nuk duhet të bëhet asnjë lloj pisllëku në det. Ne kemi pronat tona, kemi plazhin tonë, bëjmë plazh përditë në plazh të vjetër. Plazhi i vjetër është lënë pas dore nga qeveria dhe nga pushteti lokal," ankohet vlonjati duke na shpjeguar se pushteti lokal i përket të majtës.

 
 
LOKALE
BBC nëpër Shqipëri - Vlora
10 qershor, 2009 | Faqja Kryesore
GJITHASHTU
 
 
Dërgoja një miku   Version i printueshëm
 
 
 
BBC ©
 
^^ Kthehu në krye
 
  Arkiv
 
  BBC News >> | BBC Sport >> | BBC Weather >> | BBC World Service >> | BBC Languages >>