BBCAlbanian.com
 
Botuar: E premte, 12 qershor 2009 - 17:21 CET
 
Dërgoja një miku   Version i printueshëm
Puka në mes të mundësive dhe mungesave
 

 
 
Hyrja e qytetit të Pukës
Një tabelë mirëpret vizitorët në Pukë
Gjatë udhëtimit me ekipin e BBC-së nëpër disa qytete të veriut të Shqipërisë ndaluam në shtëpinë e Përparim Laçit, një ndër 40 hanet në qytetin e Pukës.

Përparimi na ka mbushur tryezën plot e përplot me prodhime të vendit dhe të traditës.

Është një familje e madhe që i është kushtuar sportit dhe mbijetesës së traditës dhe kulturës në fushën e turizmit.

Në shtëpinë në Han të Laçit, gjithcka, që nga muret e ornamentet, etnografia, enët dhe ushqimet, janë të traditës. Me këtë rikthim në traditës ai ka tërhequr jo vetëm vëmëndjen e vizitorëve vendas por nga mbarë bota.

"Ka vetëm ushqime shtëpije," na tregon ai.

"Disponoj një park me bletë, disponoj një tufë me dhi, disponoj lopë. Gatuhet ushqim vetëm shtëpije. Vetëm ushqim bio. Asnjë gjë të përzime. Vetëm bashkëpunim me Agropukën. Shumë i frutshëm për të huajt."

Gjatë pushimit tonë në këtë han, nuk mund të rrimë pa parë me kureshtje dhe fotot e varura në muret e vjetra të pjesëtarëve të familjes, të cilët janë të gjithë kampionë në sportet dimërore.

Përparim Laçi tregon fotot e familjes së tij sportive
Përparim Laçi tregon fotot e familjes së tij sportive

Vetë Laçi është ngjitur deri në Himalajë, dhe ka shumë foto me personalitete të vendit dhe të huaja, ku shquhet një me udhëheqësin shpirtëror të Tibetit Dalai Lama.

Ndërkohë më e vogla e shtëpisë Saudita, nxënëse në klasën e tetë, aktualisht kampione e vendit në ski, nuk fsheh dëshirën e saj të madhe që një ditë të përfaqësojë Shqipërinë në këtë sport.

"Dëshira ime është të bëhem kampione Shqipërie dhe të përfaqësoj Shqipërinë edhe jashtë," thotë Saudita.

Prodhime vendore

Teksa kemi lëshuar Hanin, në një dyqan të shoqatës "Agropuka", shohim se ka prodhime vendore.

Nuk mungojnë dhe vizitorët e huaj, të thonë vendasit, të cilët pëlqejnë prodhimet bio nga flora dhe fauna e famshme e bjeshkëve dhe pyjeve të Pukës, jo vetëm me vlera ushqimore, por dhe kurative.

Kryetari i shoqatës "Agropuka", Sabah Djaloshi, thotë se shoqata ka mundur të ketë prodhimet e veta dhe të dalë edhe në treg brenda dhe jashtë vendit.

Ai thotë se prodhimet e siguruara kanë sjellë të ardhura të mira për shumë familje, por zoti Djaloshi thotë se dhe shteti duhet të kontribojë me politika të posaçme për zhvillimin e bujqësisë të turizmit malor dhe atij familjar.

"Nuk është shumë e lehtë që në një zonë malore, siç është Puka të ecet pa ndihmën ose të donatorit ose të shtetit," thotë zoti Djaloshi duke vënë në dukje se shteti ka ofruar disa subvencione siç është për pemë frutore, blegtori.

"Ne do të përpiqemi të krijojmë mundësi të tjera. Ne si shoqatë do të vazhdojmë aktivitetin tonë, pasi ne e kemi një bazë sot për sot.

"Kemi produkte të cilat i përpunojmë në qendër të përpunimit dhe jemi në treg me ta, por jam me atë që për zonat malore politikat subvencionuse duhet të kenë prioritet," tha ai.

Shqetësimet e pukjanëve

Natyra Pukës i ka falur përveç dimrit të ashpër, edhe pasuri nëntokësore, pyje dhe kollota, që në shumë siparfaqe edhe janë djegur, por veçanërisht ujrat e kristalta janë një pasuri më vete.

Jashtë përpjekjeve për zhvillim, pukjanët kanë dhe probleme të përditshme të jetës së tyre, dhe presin që shteti dhe politika, sidomos tani në fushatën elektorale, të marrin përgjegjësitë, që Puka të mos jetë një oaz i harruar.

Mendimet e pukjanëve për gjendjen e rajonit janë të ndryshme.

"Punon gruaja, punon vajza, vetë jam me një kemp, shumë mirë. Po bëj shtëpi," thotë një pukjan.

"Papunësi ka. Unë jetoj me ilaçe tash 18 vjet dhe ende nuk e ka vënë dikush një gur në rrugë për të na bërë rrugën në radhë të parë.

"200 metra rrugë janë dhe asnjëri, as socialistët as demokratët nuk e kanë bërë. Dhe kështu janë të tana lagjet. Ka lagje dhe pa rrugë hiç se nuk kanë vënë dorë në to," thotë një tjetër.

"Unë jam në pension kooperative. Marrë 80 mijë lekë të vjetra pension dhe jetoj disi me të. Kam një lopë. Mbijetojmë me familje," thotë një xhaxha.

Kryetari i bashkisë së Pukës, Rustem Struga, thotë se bashkia nuk ka fondet e duhura për të zgjidhur problemet që shqetësojnë banorët e Pukës.

Sipas tij, nuk ka fonde për financimin e projekteve për zhvillimin e turizmit malor dhe atij familjar, por edhe për strategjinë e zhvillimit të bashkisë.

"Për fat të keq akoma nuk ka një strategji për zhvillimin e zonave malore, dhe kur nuk ka një strategji për zhvillimin e zonave malore, të gjitha strategjitë që kanë të bëjnë me këto zona rrezikojnë të mbesin më shumë në letra se sa të vihen në zbatim," thotë zoti Struga.

"Mua më vjen keq ta them sepse rruga Durrës-Kukës është një vepër madhore, është një vepër kombëtare, por përsa i përket zonës tonë na krijon disa efekte negative për momentin," thotë ai.

Ndryshe nga pjesa tjetër verilindore e Shqipërisë, që do të përfitojë nga Korridori Durrës-Kukës, ky projekt anashkalon gjithë Pukën e Fushë Arrësin, dhe i nxjerr ato nga aksi i lëvizjeve të udhëtarëve, mjeteve dhe mallrave që shkojnë e vijnë nga Kukësi e Kosova në Tiranë e Durrës.

 
 
GJITHASHTU
 
 
Dërgoja një miku   Version i printueshëm
 
 
 
BBC ©
 
^^ Kthehu në krye
 
  Arkiv
 
  BBC News >> | BBC Sport >> | BBC Weather >> | BBC World Service >> | BBC Languages >>