Jonuz Hallaçi Korrespondenti i BBC-së në Kukës

	Spitali i Librazhdit

Shumë prej rasteve urgjente zgjidhen nga vetë banorët, me shpenzimet e tyre, dhe në raste të rralla dhe nga ajri me helikopterë të Ministrisë së Shëndetësisë.

"Jam aksidentuar dhe për orë të tëra plaga më ka kulluar gjak në lëndinë," thotë për BBC-në një banor i komunës Ujmisht në Kukës.

"Kam lajmëruar ambulancën dhe policinë, por askush nuk më erdhi në ndihmë derisa mbërrita në spital me një makinë të rastit, në prag të vdekjes, " thotë ai.

Ndërsa banorë të tjerë jo vetëm nga zonat e thella të Kukësit, por dhe nga rrethe të tjera skajore dhe të largëta pohojnë se ndihma e parë mbërrin tek ata në raste të rralla.

Probleme ka më së shumti gjatë dimrit ku rrugët bllokohen.

Edhe banorët që janë afër qendrave shëndetësore dhe në qytet, sjellin fakte të tjera për vështirësitë në shërbimin spitalor siç janë mungesat e paisjeve, mjekëve specialistë dhe mbi të gjitha mitmarrja dhe blerja e ilaçeve nëpër farmacitë jashtë spitaleve.

"I kam dhënë vetë mjekut para për operacionin e djalit, megjithëse ai nuk më ka kërkuar, por ilaçet i kam blerë vetë nëpër farmaci," thotë Qerimi, një 45-vjeçar nga Kukësi.

Një nënë e re me fëmijën në duar shton se ka paguar vazhdimisht jo vetëm për mjekun, por edhe për infermieret për të bërë serumet dhe gjilpërat, ndërkohë që blerja e ilaçeve është e përherëshme.

Autoritetet lokale dhe drejtuesit e shëndetësisë në këto zona vazhdimisht i kanë kërkuar Ministrisë së Shëndetësisë që të ndërhyjë me fonde për përmirësimin e infrastrukturës spitalore, plotësimin e organikave me mjekë specialistë, në mënyrë që të sëmurët të mos marrin rrugët për tu mjekuar në Tiranë, apo Kosovë.

Spitalet rajonale

Bazë e reformës spitalore që po bëjmë është një decentralizim i kompetencave, i buxheteve nga qendra në drejtim të spitaleve rajonale.   Anila Godo, ministrja e Shëndetësisë

Ministrja e Shëndetësisë thotë se po aplikon strategjinë e re për reformën në shërbimin shëndetësor.

Ministrja e Shëndetësisë, Anila Godo, thotë për BBC-në se thelbi i reformës është në forcimin e spitaleve rajonale që do të jenë në qendrat e prefekturave.

"Bazë e reformës spitalore që po bëjmë është një decentralizim i kompetencave, i buxheteve nga qendra në drejtim të spitaleve rajonale," thotë zonja Godo.

"Spitalet rajonale do të kenë më shumë fuqi në kuptimin edhe të një tutorie, të një përgjegjësie që do të kenë për tërë rajonin.

"Përveç konstruksionit, problemit të infrastrukturës, mendoj që ka shumë vend për të ndërhyrë në drejtim të paisjeve shëndetësore."

Ministrja pranon se mungojnë mjekët specialistë nëpër rajone.

"Një farë pune ne e kemi filluar dhe konkretisht në spitalin e Tropojës do të punësojmë dhe nga Tirana dikë," thotë ministrja e shëndetësisë.

"Derisa të përgatiten specialistë të rinj, kuptohet ne s'mund të presim, pra do të përpiqemi të gjejmë specialistë duke iu ofruar edhe një motivim më shumë sesa rroga normale në mënyrë që të vijnë," thotë ajo.

Ajo thotë se ka diskutuar me autoritetet në Kosovë për mundësinë e kontraktimit të specialistëve kosovarë për të punuar në spitalet rejonale të zonës.