Vjeshtën e kaluar, Kosova është ftuar nga Gjykata që të paraqesë deklaratën e saj me shkrim, deri më 17 prill të vitit të këtij viti, për ligjshmërinë e shpalljes së pavarësisë së Kosovës, e cila kontestohet nga Serbia.

Gjykata u ka kërkuar edhe vendeve anëtare të OKB-së që deri në mesin e muajit të ardhshëm të deklarohen me shkrim nëse shpallja e pavarësisë së Kosovës është në përputhje me të Drejtën Ndërkombëtare.

Kryetari i Aleancës për Ardhmërinë e Kosovës, Ramush Haradinaj ka kritikuar institucionet e vendet se nuk janë serioze në përgatitjet për të argumentuar se shpallja e pavarësisë së Kosovës ishte një akt i ligjshëm.

“Në fillim kemi pasur një punë intensive, së fundmi marrim vesh pak çka po ndodhë. Jemi të shqetësuar për përgatitjet për këtë ngjarje me rëndësi në kuadër të ligjit ndërkombëtar për Kosovën. Mendojmë se Kosova nuk është serioze në përgatitjet rreth kësaj teme. Nuk hetohet serioziteti i duhur për një temë si kjo. Ne mendojmë se vendimi ka qenë i ligjshëm, por besojmë poashtu se nuk po përgatitemi si duhet ta dëshmojmë këtë”, tha z.Haradinaj.

Por zëvendësministrja e Punëve të Jashtme të Kosovës, Vlora Çitaku, thotë se qeveria ka ndërmarrë të gjitha veprimet e nevojshme për t'u përballur me Gjykatën Ndërkombëtare të Drejtësisë.

Sipas, saj, argumentet e Kosovës do të jenë të shumta, por se asgjë nuk mund të bëhet publike derisa deklarata të mos deponohet në Gjykatën Ndërkombëtarë të Drejtësisë në Hagë.

“Është kusht dhe rregullore e brendshme edhe e Gjykatës dhe është kërkesë edhe nga koordinatori ynë që ta ruajmë diskrecionin deri në momentin e deponimit të përgjigjes me shkrim. Afati përfundimtar për deponimin e përgjigjes është 15 prilli. Deri atëherë Kosova do të jetë e përgatitur, ne kemi marrë të gjitha hapat në mënyrë që Kosova të përfaqësohet në mënyrë sa më profesionale dhe dinjitoze para Gjykatës Ndërkombëtare të Drejtësisë”, theksoi ajo.

Numri dy i diplomacisë kosovare, Vlora Çitaku ka thënë se Kosova po i bashkërendon punët edhe në nivelin ndërkombëtar me shtetet që kanë njohur pavarësinë dhe beson se ato do të deklarohen para Gjykatës në favor të Kosovës.

Përgatitjet për të mbrojtur të drejtën e Kosovës para Gjykatës po bëhet nga ekspert britanik, Michael Wood si kryesues të ekipit ligjor të Prishtinës.

Ndërkohë, edhe autoritetet në Beograd po përgatiten për t’u përballur me Gjykatën Ndërkombëtare të Drejtësisë lidhur me Kosovën. Zyrtarë serbë besojnë se do të arrijnë të dëshmojnë se, siç thotë ata, “shpallja e pavarësisë nga ana e institucioneve të Kosovës ka qenë një akt i paligjshëm dhe në kundërshtim me të drejtën ndërkombëtare”.

Beogradi zyrtar llogarit në mbështetjen e vendeve anëtare të OKB-së, që nuk e kanë njohur pavarësinë e Kosovës.

Mendimi që Gjykata Ndërkombëtare e Drejtësisë do ta japë lidhur me ligjshmërinë e shpalljes së pavarësisë së Kosovës nuk do të ketë karakter obligativ, por vetëm këshilldhënës.

Autoritetet serbe në Beograd besojnë se me dërgimin e rastit të Kosovës para Gjykatës në Hagë kanë arritur të ndalin trendin e njohjes së Kosovës dhe presin rezultate më të mira pas vendimit.

Polemika edhe për njohjen e Kosovës

Zëvendësministrja e Punëve të Jashtme, Vlora Çitaku, ka thënë se vendimi i Gjykatës Ndërkombëtare të Drejtësisë nuk do të ndikojë fare që pavarësinë e Kosovës ta njohin edhe shumë vende të tjera.

“Trendi i njohjeve nuk është ndalur për shkak të Gjykatës dhe ne besojmë që pavarësisht vendimit, procesi i njohjeve do të vazhdojë. Pavarësia e Kosovës është process i pakthyeshëm, Kosova është fakt i kryer dhe kjo gjë që nuk do të ndërrojë pavarësisht mendimeve që do të dalin nga Gjykata”, deklaroi zëvendësministrja Çitaku.

Kryetari i Aleancës për Ardhmërinë e Kosovës në opozitë, Ramush Haradinaj ka shfaqur bindjen se numri i njohjeve do të rritet në saje të lobimit të Shteteve të Bashkuara të Amerikës.

“Ne jemi të kënaqur me vendet që na kanë njohur dhe është fat i mirë që i kemi miqtë amerikanë, Uashingtonin përndryshe do të ishim shumë keq. Besoj që kanë me ndodhë njohje në të ardhmën, por jo falë këtyre që po dalin në gazetat tona ditore por falë Uashingtonit”, u shpreh z.Haradinaj.

Që nga muaji tetor kur Asambleja e Përgjithshme e OKB-së miratoi kërkesën e Serbisë për t’i kërkuar mendim Gjykatës Ndërkombëtare të Drejtësisë nëse shpallja e pavarësisë së Kosovës ishte në kundërshtim me të drejtën ndërkombëtare, Kosovën e kanë njohur tetë shtete, në mesin e të cilave edhe dy shtetet fqinje, Maqedonia dhe Mali I Zi.

Numri i shteteve që kanë njohur Kosovën shtet të pavarur dhe Sovran ka shkuar në gjithsej 56.