Violeta Hyseni dhe Fahriu Musliu BBC, Prishtinë-Beograd

	Pamje nga Mitrovica

Në një numër incidentesh që kanë ndodhur ditët e fundit në veri të Mitrovicës iu është vënë flaka disa dyqaneve të shqiptarëve, ndërsa si pasojë e mjeteve shpërthyese janë lënduar gjashtë zjarrfikës serbë.

Situata në qytetin e ndarë të Mitrovicës vazhdon të mbetet e tensionuar, por nën kontrollin e KFOR-it dhe EULEX-it që kanë shtuar praninë e tyre në veri.

Zëvendëskryeministri i Kosovës, Hajredin Kuçi, thotë për BBC-në se përmes kompensimit të dëmeve materialeve që iu janë shkaktuar pronave të shqiptarëve, qeveria synon të nxisë normalizimin e jetës për banorët e atjeshëm.

"Është një stimulim për të rikthyer punën dhe jetën në atë pjesë, është një përkujdesje për qytetarët e Republikës së Kosovës në cilëndo pjesë të territorit, sikur që është edhe një përkushtim politik për Kosovën, për qytetarët dhe çdo pjesë të saj", u shpreh ai në një intervistë për BBC-në.

Zëvendëskryeministri Kuçi tha se përveç shtimit të masave të sigurisë në veri të Mitrovicës, qeveria është në bisedime me autoritetet ndërkombëtare, nga të cilat ka kërkuar që të shtojnë presionin ndaj Serbisë për të ndalur nxitjen e veprimeve të dhunshme në Kosovën Veriore.

"Qeveria është duke i marrë tri masa paralelisht, në radhë të parë me organet e rendit në Kosovë duke rritur shkallën e gatishmërisë së tyre, në koordinim të plotë me KFOR-in dhe EULEX-in. Angazhimi i dytë është që të ketë koordinim dhe kontakt të plotë me qytetarët e për t'i stimuluar që të vazhdojnë jetën atje, për të mos pasur panik dhe për të rritur shkallën e besimit në institucionet vendore dhe ndërkombëtare në Kosovë.

Angazhimi ynë i tretë janë kontaktet me bashkësinë ndërkombëtare duke kërkuar që të bëhet presion në qeverinë e Beogradit, që të mos bëjnë veprime destruktive dhe të dhunshme në territorin e Republikës së Kosovës", tha zoti Kuçi.

Opozita ndërkaq ka dalë me një propozim konkret për vendosjen e rendit dhe ligjit në veri të Mitrovicës dhe parandalimin e incidenteve tjera.

Kryetari i Aleancës për Ardhmërinë e Kosovës, Ramush Haradinaj, ka propozuar hapjen e tri nënstacioneve policore në lagjet e banuara me shqiptarë në veri të Kosovës.

Kjo, sipas tij, nuk do të shkaktonte ndarje mes komuniteteve, por do të krijonte një brez të sigurisë më të madhe, ku nuk do të mund të ndodhnin incidente për shkak të pranisë më të madhe të policisë së Kosovës.

"Ky veprim do të mund të zhvillohej në harmoni me EULEX-in që është prezent në veri, me forcat e KFOR-it, në mënyrë që një pjesë të asaj që quhet rend të ndodhë drejtpërdrejt dhe të garantohet prona, jeta e njerëzve, por edhe të evitohen incidentet e mundshme çfarë i kemi parë këto ditë", tha z. Haradinaj.

Ai kritikoi autoritetet e Beogradit të cilat, siç tha, përmes shfrytëzimit të kartave të tyre ekstremiste në Kosovë, po përiqen ta destabilizojnë gjendjen dhe ta pengojnë pavarësimin e plotë të vendit.

Lideri opozitar tha se përveç thirrjeve të institucioneve të Kosovës bërë qytetarëve për vetpërmbajtje nga dhuna, duhet të ndërmerren masa konkrete për të garantuar sigurinë e të gjithë qytetarëve.

"Nëse ne e lëmë veriun vetëm me thirrjen për vetpërmbajtje duhet ta kemi parasysh se qytetarë të caktuar mund të vetpërmbahen, por poashtu qytetarë tjerë mund ta kenë agjendë provokimin e incidenteve në vazhdimësi. Kësisoji përmes thirrjeve për vetpërmbajtje ne nuk sigurojmë rend, ligj dhe qetësi, por mund të kemi përkeqësim ë gjendjes", deklaroi të hënën kryetari i Aleancës për Ardhmërinë e Kosovës, Ramush Haradinaj.

Reagimet serbe

Presidenti i Serbisë, Boris Tadiq, i ka dërguar një notë proteste bashkësisë ndërkombëtare lidhur me incidentet e fundit në veri të Mitrovicës.

Në një letër drejtuar anëtarëve të Këshillit të Sigurimit, Sekretarit të Përgjithshëm të OKB-së, Ban Ki Mon dhe presidencës çeke të BE-së, zoti Tadiq ka thënë se KFOR-i, EULEX-i dhe UNMIK-u nuk kanë reaguar me kohë për të parandaluar, siç është shprehur ai, sulmin mbi serbët.

Presidenti Tadiq thekson në letrën e tij se "autoritetet e Kosovës dhe ekstremistët shqiptarë po përpiqen që me dhunë të provokojnë konflikte me serbët, në mënyrë që të pengojnë zbatimin e marrëveshjes gjashtëpikëshe ndërmjet Kombeve të Bashkuara dhe Serbisë, që është kundërshtuar nga Prishtina".

Në një reagim tjetër lidhur me zhvillimet në Mitrovicë, Sekretari Shtetëror serb për Kosovën, Oliver Ivanoviq, i ka deklaruar medias në Beograd se Qeveria e Serbisë duhet ta ndërrojë udhëheqjen e spitalit në pjesën veriore të Mitrovicës për shkak se komandantit të forcave të KFOR-it "Veri", Mishel Jakovlev,nuk i është lejuar t'i vizitojë të të dielën lënduarit në incidentet e fundit që kanë ndodhur në Mitrovicë dhe këtë e ka quajtur skandal diplomatik.

Sipas Ivanoviqit, kur merret parasysh se KFOR është institucion i vetëm kredibël, se ata po thërriten të intervenojnë sa here që ndodh ndonjë incident, kur merret parasysh se Serbia ka marrëdhënie të çrregulluara me NATO-n dhe po orvatet t'i përmirësojë, në një situatë të tillë është e palejueshme një manifestim autarkie.

Komandantiti i forcave shumetnike të KFOR-it në sektorin verior, tha se mbi gjysmë ore kishte pritur lejen për të vizituar të plagosurit, por se kërkesa e tij nuk ishte plotësuar.

Ndërkohë, Këshilli Nacional Serb në veri të Mitrovicës ka fajësuar shqiptarët për incidentet e fundit në qytetin e etnikisht të ndarë.

Kryetari i këtij këshilli, Milan Ivanoviq, u ka bërë thirrje qytetarëve serbë që të qëndrojnë të qetë dhe të mos i përgjigjen provokimeve eventuale të shqiptarëve.

"Ne nga ana jonë duhet të bëjmë krejt çka është e mundur, t'i thërrasim UNMIK-un dhe KFOR-in që të bëjnë atë që është punë e tyre, të ofrojnë siguri, të vendosin pikë- kontrolli në vendet e duhura që shënojnë vijat e ndarjes etnike.

Ata tani po e kontrollojnë tani gjendjen në rrugën ndërmjet Mitrovicës dhe Zveçanit, sikur të ishin kryer sulmet nga ajo anë, e jo nga ana e shqiptarëve. Ne ftojmë autoritetet tona në Beograd që të reagojnë të bashkuar dhe të gjithë së bashku, në nivelin qëndror dhe lokal, të japim kontributin tonë për qetësimin e gjendjes", tha z.Ivanoviq.

Nga ana tjetër, një përfaqësuese tjetër e serbëve, Rada Trajkoviq, ka drejtuar gishtin tek vet serbët për tensionimin e gjendjes në Mitrovicë.

Zonja Trajkoviq tha se në mesin e shqiptarëve ka gjithmonë ekstremistë që dëshirojnë të provokojnë incidente, por nënvizoi se kësaj radhe kanë qenë vet serbët ata që kanë gjuajtur bombë në drejtim të zjarrfikësve dhe kanë sulmuar ekipin e gazetarëve të televizionit lokal serb, Most në veri të Mitrovicës.

Rada Trajkoviq kërkoi nga qeveria serbe që të parandalojë përfshirjen e faktorit serb në destabilizimin e situatës.