Arbër Vllahiu Korrespondent i BBC-së në Prishtinë

Pas vizitës në veri të Kosovës, ministri serb Bogdanoviq, ka kërkuar nga forcat paqeruajtëse, EULEX-i dhe UNMIK-u, që të garantojnë sigurinë për të gjithë qytetarët e Kosovës e në veçanti për serbët e veriut, që sipas tij, janë të rrezikuar.

Ministri serb për Kosovën ka vizituar në spitalin e Mitrovicës së veriut, gjashtë zjarrëfikësit e lënduar në shpërthimin që ndodhi dy netë më parë, ndërkohë që vizita u është mohuar zyrtarëve të EULEX-it dhe të KFOR-it.

Media serbe ka njoftuar se pas incidenteve të natës së 2 janarit, edhe mbrëmë dy qytetarë serbë janë rrahur nga një grup prej 20 shqiptarësh, në pjesën veriore të Kosovës dhe kanë kërkuar ndihmë mjekësore për shkak të lëndimeve të lehta trupore.

Por zëdhënësi i Policisë së Kosovës në Mitrovicë, Besim Hoti, tha se nuk ishte në dijeni të shkaqeve të rrahjes së dy qytetarëve në veri dhe nuk e dinte nëse incidenti kishte motive ndëretnike.

Ndërkaq, autoritetet ndërkombëtare në Prishtinë kanë deklaruar se nuk do të tolerojnë dhunën në Kosovë, dhe i kanë bërë thirrje popullit të Mitrovicës që të ruaj qetësinë dhe të ndalë çdo veprim të dhunshëm.

EULEX-i dhe KFOR-i kanë shtuar praninë e tyre në veri ndërkohë që serbët e kësaj pjese kanë kërkuar postblloqe të përhershme në disa pika të caktuara.

Kërkesa e udhëheqësve serbë të veriut është cilësuar si përpjekje për të ndarë Kosovën në vija administrative, por policia e Kosovës thotë se nuk sheh arsye për të vendosur postblloqe të tilla, meqë ato sipas saj, do të krijonin enklava të reja.

Policia thotë se detyrë e saj do të jetë ruajtja e rendit dhe qetësisë për të gjithë qytetarët e Kosovës.

Ndërkohë, udhëheqës politikë të Kosovës kanë deklaruar se në veriun e saj duhet të vendoset rendi dhe ligji dhe kanë fajësuar grupe të ndryshme, siç i kanë quajtur, të kriminalizuara se po veprojnë në përshkallëzim të situatës.

Qeveria e Kosovës në një deklaratë të saj, u ka bërë thirrje qytetarëve të Kosovës që të kenë besim në vendosmërinë dhe kapacitetet e institucioneve vendore dhe ndërkombëtare në përpjekjet e tyre që të tregojnë vullnetin për një Kosovë të qetë, të qëndrueeshme dhe të sigurt për të gjithë.

Kryetari i Mitrovicës, Bajram Rexhepi, i tha BBC-së se qytetarët serbë të veriut po mbahen peng të grupeve të caktuara atje.

Zoti Rexhepi tha se forcat e KFOR-it do të qëndrojnë në veri deri më 13 janar, për të qetësuar situatën e krijuar.

Sipas tij, në veri duhet të vendoset rendi dhe ligji, dhe e cilësoi si shumë optimiste përpjekjen për integrimin e plotë të serbëve të Kosovës gjatë vitit 2009.

Incidentet e ditëve të para të Vitit të Ri kanë ngritur tensionet ndërmjet komuniteteve, pak javë pas shtrirjes së misionit evropian për drejtësi dhe polici në territorin e Kosovës.