Fatos Ahmati Korrespondent i BBC-së në Tiranë

	Kuvendi i Shqipërisë

Ashtu sikurse pritej, ai mori trajtat e një fushate elektorale, ndonëse ajo është ende larg. Si zakonisht, në krye të debatit ishte kreu i qeverisë, Sali Berisha, i cili e quajti buxhetin e vitit të ardhshëm si më të madhin në historinë e Shqipërisë që e afron atë me standardet e Bashkimit Europian.

“Ai përfaqëson finishin e suksesshëm të një katërvjecari, për t'i hapur rrugën një fillimi të ri të madh”, tha zoti Berisha. Ai nënvizoi faktin tashmë të njohur se buxheti i vitit të ardhshëm është më i madhi në historinë e Shqipërisë. Ai kap vlerën e rreth 5 miliardë dollarëve.

Kryeministri shqiptar, i cili udhëheq dhe maxhorancën e djathtë, u shpreh i bindur se partia e tij do të fitojë zgjedhjet e ardhshme për shkak të mbajtjes se premtimeve të dhëna.

Në shifrat e shumta që solli zoti Berisha, binte në sy rritja e pensioneve dhe pagave nga 50 deri në 110 për qind, rritja e investimeve në fushën e arsimit si dhe investimet në rrjetin rrugor, për të cilin ai tha se janë 8 herë më të larta se në kohën e qeverive socialiste. “Ky është një buxhet kampion dhe kampioni të mund “ u tha kryeministri Berisha kundërshtarëve të tij të opozitës së majtë.

Opozita e quajti buxhetin e paraqitur si të dështuar. Nënkryetari i grupit parlamentar të PS-së, Erion Braçe tha se qeveria e zotit Berisha nuk kishte mbajtur asnjë premtim.

“Ky buxhet nuk jep asnjë lloj shprese”, tha zoti Braçe. “Shqiptarët janë me borxhe, por do t'i paguajnë duke hequr nga pushteti Sali Berishën”, shtoi nënkryetari i grupit parlamentar socialist.

Debati ka vazhduar deri në orët e para të mëngjesit, por votimi për buxhetin e ri të shtetit pritet të bëhet të hënën e ardhshme.