Deputetët grevistë kanë marrë pjesë në seancë duke folur dhe duke përsëritur kundërshtimin e tyre ndaj projekt-kodit zgjedhor të përgatitur me konsensusin e dy partive të mëdha.

Seanca ishte parashikuar të niste të hënën, por u shty për t'u dhënë mundësi disa partive për t'u njohur me projektin.

Disa parti të vogla, të kryesuara nga Lëvizja Socialiste për Integrim kanë kërkuar dy javë kohë.

Sipas sekretarit te pergjithshëm të kësaj të fundit, Petrit Vasili, kjo është një e drejtë legjitime e tyre që ua njeh Rregullorja e parlamentit.

Në kampin e PS-së, kryetarja e grupit parlamentar, Valentina Leskaj, tha për BBC-në se pretendimet e LSI-së janë një keqinterpetim i rregullores së parlamentit.

Ndërkaq, kreu i grupit parlamentar të PD-së, Astrit Patozi, duke konfirmuar mbledhjen e parlamentit, tha se ishin kapërcyer të gjitha afatet kohore për zhvillimin e saj, ndërsa shtoi se nuk priste befasi në miratimin e Kodit ashtu siç ishte hartuar nga Komisioni i Reformës Zgjedhore.

Kjo, thotë korrespondenti i BBC-së në Tiranë, nuk nënkupton përfilljen e kërkesave të deputetëpve grevistë.