Sekretari i Përgjithshëm i LSI-së, Petrit Vasili, tha se kjo kërkesë ishte një e drejtë legjitime e tyre që ua njeh Rregullorja e parlamentit shqiptar.

Në kampin e PS-së, kryetarja e grupit parlamentar, Valentina Leskaj, tha për BBC- në se pretendimet e LSI-së janë një keqinterpetim i rregullores së parlamentit, kurse kreu i grupit parlamentar të PD-së, Astrit Patozi, tha se nuk priste befasi në miratimin e Kodit, ashtu siç ishte hartuar nga Komisioni i Reformës Zgjedhore.

Ndërkaq, duke folur për programin e mëngjesit të BBC-së, kryetari i Lëvizjes Socialiste për Integrim, Ilir Meta, e quajti arrogancë konsesuale vendosmërinë e PD- PS-së për të miratuar një kod që, sipas tij, garanton manipulimin e votave.

Seladin Xhezairi bisedoi me zotin Meta dhe fillimisht e pyeti se si e vlerësonte ai situatën e krijuar?

Zoti Meta: Mendoj se situata është në një rrugë pa krye, për arsye se arroganca konsesuale PD- PS, synon një Kod që të garantojë manipulimin e votave në favor të këtyre dy forcave politike përmes diskriminimit të forcave të tjera politike dhe njëkohësisht përmes shkeljes të gjithë rregullave të një loje të barabartë duke cënuar jo vetëm kushtetutën tonë e cila shprehet shumë qartë për barazinë në zgjedhje dhe për barazinë e votës, por njëkohësisht duke cënuar shumë rëndë edhe principet ndërkombëtare për zgjedhjet dhe vetë rekomandimet e OSBE ODIHR-it, sidomos për proçesin e administrimit të zgjedhjeve. Pra, them se ka arritur në një rrugë pa krye pasi kuptohet se çdo kalim me forcën e kartonit të këtij lloj kodi nuk mund ta ndërpresë për asnjë sekondë kontestimin ndaj kodit.

BBC: Zoti Meta, a jeni njohur me projektligjin më të ri?

Zoti Meta: Ne nuk jemi njohur përfundimisht sepse nuk kemi ne dorë një material përfundimtar të kodit por pak a shumë ne i dimë ato pikat më të rëndësishme të tij dhe e kemi shume te qartë mënyrën sesi është kompozuar proçesi i administrimit të votave, si një proçes tërësisht monopol i PD-së dhe i PS-së.

BBC: Ju keni kërkuar dy javë kohë për shqyrtimin e këtij projektligji. Zoti Meta a do të thotë kjo se nëse u jepet ky afat, do të ndërprisni grevën e urisë?

Zoti Meta:Nuk ka lidhje kjo me këtë çështje, mendoj se më keni kërkuar të respektohen proçedurat normale të kuvendit të Shqipërisë dhe njëkohësisht ju besoj se e keni dëgjuar edhe ambasadorin e OSBE-së I cili e ka bërë të qartë dje se kodi ka jo pak probleme dhe se kërkohet kohë për t'u diskutuar dhe për t'u miratuar, megjithatë ne nuk kemi iluzione se do të ndërmerren iniciativa për t'i dhënë kohë këtij debati, sepse nuk ka patur asnjëherë qëllim nga PD-ja dhe nga PS-ja për të realizuar një konsesus sa më të gjerë dhe sa më të shëndetshëm që garantonte një kod të standartave vërtetë ndërkombëtare. Ata që për tre orë nuk u menduan shumë dhe përmbysën kushtetutën, sigurisht që me kartonat e tyre mund të bëjnë edhe këtë akt tjetër që unë do t'a konsideroja kriminimal për zgjedhjet e ardhshme në Shqipëri dhe për vetë perspektivën demokratike të Shqipërisë.

BBC: Kur mendoni t'i jepni fund grevës së urisë?

Zoti Meta:Mendoj se kjo është një çështje që nuk më mbetet mua thjesht për ta vendosur dhe që do të gjykohet në kohën më të përshtatëshme. Megjithatë, dua të them se greva e urisë nuk ka qenë dhe nuk mbetet një qëllim në vetevete, ajo besoj se ka arritur me mjaft sukses deri tani të sensibilizojë mbarë opinionin kombëtar vendas, por edhe një pjesë të mirë të komunitetit ndërkombëtar për atë rrezik të madh që i kanoset demokracisë në vendin tonë dhe kemi fituar një përkrahje shumë të madhe sidomos brenda vendit duke ndërgjegjësuar njerëzit për rrezikun në të cilin ndodhen liritë e tyre pas përmbysjes së Kushtetutës dhe në prag të miratimit të një kodi tërësisht përjashtues dhe cënues ndaj votës së lirë.