Prishtina përshëndet njohjen

Prishtina zyrtare ka përshëndetur njohjen e pavarësisë së Kosovës nga ana e Maqedonisë dhe Malit të Zi, duke e quajtur këtë si sinjal se njohjet do të vazhdojnë, pavarësisht përpjekjeve të Beogradit për ta ndalur këtë proces.

Zëvendëskryeministri Ramë Manaj i ka thënë BBC-së se njohjet që kanë ndodhur mbrëmë janë dhurata më e mirë që i kanë ardhur popullit të Kosovës, një ditë pasi Asambleja e Përgjithshme e OKB-së me kërkesë të Serbisë, votoi që Gjykata Ndërkombëtare e Drejtësisë të deklarohet për ligjshmërinë e shpalljes së pavarësisë së Kosovës.

"Vendimet e qeverive të dy vendeve fqinje të Kosovës për njohjen e realitetit tashmë të krijuar, konfirmojnë përcaktimet e tyre për gatishmërinë e ndërtimit të marrëdhënieve të tyre të fqinjësisë së mirë, kontributit, paqës, stabilitetit dhe bashkëpunimit rajonal si dhe për integrimet euro-perëndimore të gjithë rajonit.

Janë më shumë se njohje dhe ato tregojnë se përpjekjet e Beogradit zyrtar kundër pavarësisë së vendit tonë, definitivisht dhe përfundimisht janë të paefektshme", u shpreh z.Manaj.

Zëvendëskryeminsitri Manaj tha se njohja nga Podgorica dhe Shkupi do të ndikojë në vazhdimësinë e marrëdhënieneve të mira të Kosovës me shtetet fqinje.

Ai shprehu keqardhje për mënyrën se si ka reaguar Beogradi ndaj aktit të njohjes së pavarësisë së Kosovës nga Mali i Zi.

"Në emër të qeverisë së Kosovës shpreh keqardhjen për veprimet reminishente të udhëheqjes serbe duke shpallur non grata ambasadorin e Malit të Zi në Beograd, veprime këto që përkujtojnë epokën e vjetër të parahistorisë, kur koha llogaritej së prapthi", theksoi zëvendëskryeministri Ramë Manaj.

Nga ana tjetër, nënkryetari i Aleancës Kosova e Re në opozitë, Ibrahim Makolli tha se njohjet e mbrëmshme nga dy ish republikat jugosllave, janë më të rëndësishmet që i janë bërë Kosovës që nga shpallja shtet i pavarur dhe Sovran.

"Njohjet nga shtetet fqinje tashmë paraqesin fundin e iluzioneve të Serbisë se Kosova do të mbetet e izoluar nga fqinjët e saj. Këto njohje pos tjerash kanë edhe një efekt tjetër, nëse disa nga vendet të cilat kanë qenë të pozicionuara kundër shtetit të pavarur të Kosovës e kanë bërë këtë pikërisht duke përdorur elementin se shteti i pavarur dhe Sovran rrezikon fqinjët e saj, njohja nga fqinjët e parë nga Maqedonia dhe Mali i Zi dëshmon më së miri se kjo "frikë" nëse ka ekzistuar te dikush, tashmë është e tejkaluar", tha z.Makolli.

Sipas tij, reagimi i Beogradit për dëbimin e ambasadorit malazias nga Serbia ka qenë i pritshëm.

"Nëse jo për tjetër, së paku për opinionin e brendshëm të Serbisë, por unë konisderoj se pikërisht njohja e Kosovës nga këto dy shtete fqinje e forcon paqën dhe stabilitetin në Ballkan, sikur që krijon mundësi të reja për ura lidhës në mes të popujve të rajonit", deklaroi deputeti i opozitës, Ibrahim Makolli.

Ndërkohë një përfaqësues politik i serbëve të Kosovës, Rangjell Nojkiq ka vlerësuar se njohja e pavarësisë nga Mali I Zi dhe Maqedonia është bërë nën presionin e komunitetit shqiptar që jeton në këto dy shtete.

"Mendoj se ky është një hap logjik që ka mundur të pritet, duke pasur parasysh se edhe Maqedonia edhe Mali i Zi janë shtete shumëetnike dhe kanë një numër të konsiderueshëm të shqiptarëve.

Subjektet politike shqiptare janë shumë të rëndësishme në të dyja shtetet, para se gjithash për faktin se në Malin e Zi, z.Gjukanoviq nuk do të mund të formonte qeverinë pa mbështetjen e partive shqiptare dhe boshnjake. Situatë e ngjashme është edhe në Maqedoni, ka presione të fuqishme të partive shqiptare dhe ato kanë kontribuar në njohjen e pavarësisë së Kosovës", tha ai.

Zoti Nojkiq shprehu bindjen e tij se njohja e pavarësisë së Kosovës nga dy shtetet fqinje, e sidomos nga Mali i Zi do të ndërlikojë për një kohë situatën në rajon.

"Mendoj se kjo situatë në masë do të komplikojë marrëdhëniet ndërmjet Serbisë dhe Malit të Zi, edhepse nuk pres lëvizje të rëndësishme diplomatike, por me siguri do të ketë një ftohje të raporteve për shkak të këtij veprimi", theksoi njëri nga përfaqësuesit e serbëve të Kosovës, Rangjell Nojkiq.

Me Malin e Zi dhe Maqedoninë është ngritur në 50 numri i shteteve që kanë njohur deri tani pavarësinë e Kosovës, gati tetë muaj pas shpalljes së saj.

Analisti Milazim Krasniqi vlerëson se njohja e Kosovës nga dy shtetet fqinje është vonuar për shkak të presioneve të fuqishme të Serbisë mbi to.

Ai thotë se jo rastësisht, Podgorica dhe Shkupi e kanë shtyer vendimin për pranimin e Kosovës deri pas miratimit të kërkesës së Serbisë në Asamblenë e Përgjithshme të OKB-së lidhur me kërkimin e opinionit të Gjykatës Ndërkombëtare të Drejtësisë për ligjshmërinë e shpalljes së pavarësisë së Kosovës.

"Ato (Mali i Zi dhe Maqedonia) kanë kërkuar një tajming, një kohë të përshtatshme, një moment kur Serbia ka pasur një ndjenjë triumfalizmi pas miratimit të rezolutës në Asamblenë e Përgjithshme. Në këtë aspekt mendoj që ka qenë një moment i planifikuar saktësisht që të shërbejë edhe si një amortizues ndaj triumfalizmit që veç ka filluar në Serbi të riciklojë nacionalzmin agresiv", tha analisti Milazim Krasniqi.