Greva e shëndetësisë ka hyrë në ditën e dytë

Greva po vazhdon pas dështimit të arritjes së një marrëveshjeje me qeverinë për rritjen e pagave.

Udhëheqës të Sindikatës së Shëndetësisë thonë se rritjet e pagave të ofruara nga qeveria nuk i plotësojnë nevojat e punëtorëve të shëndetësisë dhe ato, sipas tyre, janë rritje të përkohshme.

Qeveria e Kosovës ka ofruar një skemë të rritjes së pagave për punëtorët e shëndetësisë deri në 40 euro për tre muajt e fundit të këtij viti.

Greva e punëtorëve të shëndetësisë thuhet se mund të zgjasë deri në zgjidhjen e problemit.

Ministria e Shëndetësisë thotë se pret një zgjidhje të shpejtë të këtij problemi.

Valë grevash

Autoritetet kosovare arritën të shmangin një protestë të punonjësve të policisë duke marrë në shqyrtim një projekt për përmirësimin e gjendjes së tyre.

Muajin e kaluar qeveria siguroi një rritje të pagave të punonjësve të arsimit, duke shmangur një grevë të tyre.

Paralajmërim për grevë kanë bërë edhe punonjësit e sistemit të drejtësisë.

Por, zëvendësministri i Punës dhe Mirëqenies Sociale, Gjergj Dedaj, i tha BBC-së se i duhet dhënë një mundësi qeverisë së Kosovës për të zgjidhur problemet dhe ka shtuar se grupe të caktuara duan të realizojnë qëllimet politike me anë të protestave.