Z. Boshkovski tha se do të kërkonte edhe votat e shqiptarëve.

Ish Ministri i brendshëm Lube Boshkovski qëndroi në Hagë nga viti 2005.

Rreth dy muaj pasi u kthye nga Haga, z. Boshkovski ka shprehur ambicje politike.

Edhe pse anëtar i VMRO DPMNE-së të Kryeministrit Nikolla Gruevski, ai thotë se do të kandidojë për president më vete.

Në intervistën dhënë të përjavshmes "Fokus", z. Boshkovski paralajmëron se mund të krijojë edhe subjekt politik.

Ai thotë se në garën presidenciale po hyn për shkak se "qytetarët kanë kërkuar një gjë të tillë prej tij".

Për BDI-në e cila kryesisht doli nga ish UÇK-ja, dhe ndaj të cilës në vitin 2001, ai luftonte, thotë se ajo tani përfaqëson një faktor politik.

Kurse për rastet e tjera të Hagës, që hetojnë veprimet e UÇK-së dhe që janë kthyer në gjykatat e Maqedonisë, thotë se duhet të mbyllen me marrëveshje politike.

Në intervistën e njëjtë, z. Boshkovski thotë se nuk pajtohet me shumë politika të VMRO DPMNE-së, ndër të cilat edhe për atë për emrin.

Sipas tij një kompromis me Greqinë duhet të gjendet sa më shpejt.

Nga VMRO DPNE nuk kanë reaguar për këtë deklarata.

Presidenti në Maqedoni zgjidhet në zgjedhje direkte, të cilat pritet që të zhvillohen në pjesën e parë të vitit që vjen.