Korrespondentët e BBC-së në Shkup e Athinë

	Z. Nimetz ua bërë propozimin të dërguarve të të dy palëve

Jo zyrtarisht mësohet se propozimi i ri i z. Nimetz për emrin e Maqedonisë është "Republika e Maqedonisë Veriore".

Propozimi thuhet se është shumë më konkret, por jo përfundimtar.

Z. Nimetz propozon që emri i propozuar prej tij të jetë për komunikim të përgjithshëm, si me Greqinë, ashtu edhe me bashkësinë ndërkombëtare.

Sipas njoftime, me të, vendet që e kanë njohur Maqedoninë me emrin e saj kushtetues, nuk janë të detyruara që të përdorin emrin e ri.

Pala maqedonase për në Nju Jork u nis pa qëndrim të unifikuar.

Opozita, e mbështetur edhe nga presidenti, Branko Cërvenkovski pranon një emër që do të përcaktonte pozitën gjeografike të Maqedonisë, por me kusht që ai të mos cënonte identitetin kombëtar të popullit maqedonas.

Ndërkaq, qeveria mbështet idenë e një formule të dyfishtë: që emri kushtetues i Maqedonisë të përdoret për komunikim ndërkombëtar, ndërsa me Greqinë të arrihet zgjidhje kompromisi.

Qëndrimi i Greqisë

Greqia ka deklaruar se do ta shqyrtojë me 'predispozicion konstruktiv' paketën e ideve të negociatorit Nimetz dhe ka shprehur besimin se është e mundur të gjendet një zgjidhje përfundimtare e mosmarrëveshjes me Maqedoninë për çështjen e emrit.

Ndonëse negociatori nuk ka dhënë hollësi mbi përmbajtjen e ideve të veta që u paraqiti dy negociatorëve respektivë, shtypi në Greqi thekson se lëvizja e fundit e zotit Nimetz, do ta vërë Athinën para një dileme serioze.

Shtypi grek komenton tash e tutje do të ketë shumë rëndësi se cila nga palët do të marrë përsipër koston, në rast se e refuzon, propozimin e zotit Nimetz.

Ndërkaq, i vetmi reagim zyrtar i Athinës ka ardhur nëpërmjet zëdhënësit të ministrisë së jashtme, i cili në një deklaratë për shtyp që u lëshua të mërkurën në mbrëmje, bën të ditur se propozimi po shqyrtohet "me vëmendjen e domosdoshme dhe predispozicion konstruktiv".

"Greqia dëshiron sinqerisht zgjidhjen përfundimtare të kësaj çështjeje të rëndësishme, në mënyrë reciprokisht të pranueshme, pa fitimtarë dhe të mundur", thuhet në deklaratë, duke përfunduar se pala greke beson se kjo zgjidhje mund të bëhet e mundur.