Botuar: E martë, 09 shtator 2008 - 11:22 CET

Shqipëri - inflacioni në rënie

Sipas të dhënave për muajin gusht të Institutit të Statistikave në Tiranë, inflacioni në Shqipëri ka rënë në nivelin e 2.5 për qind, ndërsa një vit më parë i njëjti arrinte shifrën 4.2 për qind.

Gjithnjë sipas këtyre të dhënave, një rritje çmimesh ka pësuar grupi i ushqimeve dhe pijeve alkolike, ndërkohë që çmimi i naftës dhe benzinës ka shënuar një ulje nga 2.6 deri në 3.3 për qind.

Nisur nga këto pak të dhëna, disa specialistë shprehin dyshimin që inflacioni të jetë në nivelet e paraqitura. Ata thonë se metodika të ndryshme mund të sjellin rezultate të ndryshme.

Sipas shifrave zyrtare, inflacioni në vitin e fundit në Shqipëri ka qenë në nivelin e 4 për qind, një objektiv ky i vënë dhe nga institucionet ekonomike-financiare ndërkombëtare që monitorojnë Shqipërinë.