Lista e ambasadorëve pret firmën e presidentit Sejdiu

Si të ngarkuar me punë në Uashington qeveria propozon Avni Spahiun, i cili do të ketë edhe tre diplomatë, dy prej të cilëve do të përqëndrohen më shumë në Nju Jork.

Ministri i Jashtëm Skender Hyseni sqaroi se të ngarkuarit me punë në Nju Jork, nuk do të mund të akreditohen në OKB, meqenëse Kosova nuk është ende anëtare e kësaj organizate.

Emrat tjerë të propozuar për të ngarkuar me punë të Kosovës janë: Muhamedin Kullashi në Paris, Ilir Dugolli në Bruksel, Muhamet Hamiti në Londër, Vilson Mirëdita në Berlin, Albert Prengaj në Romë, Sabri Kiçmari në Vjenë, Naim Malaj në Bern, Gazmend Pula në Tiranë dhe Bekim Sejdiu në Ankara.

Kryeministri Hashim Thaçi tha se të emëruarit për të ngarkuar me punë në 10 ambasadat e para janë njerëz me bagazh patriotik dhe profesional. Ai tha se emërimi i tyre nuk është bërë mbi baza politike.

Të ngarkuarit me punë të Kosovës pritet të fillojnë punën pasi të emërohen nga presidenti Sejdiu.

Sipas Kushtetutës së Kosovës, presidenti i Republikës bën emërimin e ambasadorëve dhe të ngarkuarve me punë, pasi të ketë marrë propozimet nga qeveria.