"Është në interesin e Beogradit të ndalet kontrabanda në atë zonë"

Janë bërë më shumë se gjashtë muaj qëkur dy pikat doganore në kufi të Kosovës me Serbinë nuk po funksionojnë, duke i shkaktuar humbje të mëdha buxhetit të Kosovës, si pasojë e rritjes së kontrabandës së mallrave.

Zoti Zannier beson se rivendosja e pikës doganore në Leposaviq dhe asaj në Zubin Potok do të jetë më e lehtë, nëse për këtë sigurohet mbështetja e autoriteteve të Beogradit.

"Është bindja ime që të kemi funksionim të plotë të doganave në portën 1 dhe 31 është shumë e rëndësishme të kemi bashkëpunim me Beogradin. Mendoj se është në interesin e Beogradit të ndalet kontrabanda në atë zonë, të sigurohemi që ka kontrollë të plotë atje," tha zoti Zannier.

Doganat janë një prej çështjeve për të cilat Sekretari i Përgjithshëm i Kombeve të Bashkuara, Ban Ki Mon ka propozuar bisedime ndërmjet Prishtinës dhe Beogradit. Kreu i UNMIK-ut Lamberto Zannier tha se këto bisedime që ende nuk kanë filluar, nuk duhet të politizohen as nga pala kosovare, as nga ajo serbe.

"Kjo çështje nuk ka nevojë të politizohet dhe nuk ka nevojë të lidhet me statusin e Kosovës. Ne nuk duam që çështja e statusit të përfshihet në bisedimet për doganat që janë bisedime teknike, të cilat do të ndikojnë në rritjen ekonomike të të dyja vendeve. Do të ishte fatkeqësi nëse këto bisedime mbesin peng e debateve të ndërlikuara politike për statusin" u shpreh zoti Zannier.

Ai tha se Kosova dhe Serbia janë dy zona të ndryshme doganore.

"Fakti që tërë Kosova është një zonë e ndarë doganore duhet të pranohet edhe nga Beogradi, pavarësisht nga interpretimi i çështjes së statusit. Kosova si zonë e vetme doganore mund të jetë e ndarë nga zona doganore e Beogradit, por unë nuk kam propozuar asnjëherë që brenda zonës doganore të Kosovës, të formohen nënzona. Unë kurrë s'kam menduar se kjo do të ishte një ide e mire," tha shefi i UNMIK-ut, duke hedhur poshtë disa njoftime në media, sipas të cilave z.Zannier kishte propozuar krijimin e një nënzone doganore në veri të Kosovës.

Autoritetet serbe e konsiderojnë edhe më tutje Kosovën si pjesë të Serbisë dhe janë kundër vendosjes së pikave doganore ndërmjet dy vendeve.

Zyrtarë të qeverisë së Serbisë kanë thënë se ndërmjet Kosovës e Serbisë nuk duhet të ketë zonë doganore.

Ndërkohë Ministri kosovar i Ekonomisë dhe Financave, Ahmet Shala i ka thënë BBC-së se qeveria e Kosovës ka plane konkrete për rihapjen e dy pikave doganore në Kosovën Veriore në kufi me Serbinë dhe po punon me autoritetet ndërkombëtare që kjo të ndodhë sa më shpejt.

"Ne jemi në bashkëpunim të ngushtë me KFOR-in dhe me institucionet tjera ndërkombëtare për të rivendosur elementet e nevojshme që kontrolli në veri të jetë jo vetëm në aspektin e doganave, por edhe në aspektet tjera të sundimit të ligjit, kështu që këto ditë, mbase këto javë, veprimet konkrete do të jenë të konfimruara edhe nga vet terreni," deklaroi ministri Shala.

Ai tha se Prishtina do të mirëpriste ndihmën e Beogradit për çëshjen e doganave dhe shprehu gatishmërinë për bisedime me Serbinë si dy shteteve fqinje.

"Çdo ndihmë që mund të jetë si dy shtete për të mirën e qytetarëve të Kosovës dhe të rajonit, ne jemi të gatshëm të bashkëbisedojmë dhe të ulemi të diskutojmë, për të mirën e mirëqenies së qytetarëve, për të mirën e funksionimit të ligjit për të gjithë, pavarësisht përkatësisë së tyre dhe për të mirën e qetësimit të situatës në rajon e konsolidimit të fqinjësisë së mirë ndërmjet Kosovës e Serbisë," tha Ministri i Ekonomisë dhe Financave në qeverinë e Kosovës, Ahmet Shala.

Oficerët doganorë janë të gatshëm të kthehen në dy vendkalimet kufitare me Serbinë pas krijimit të kushteve të sigurisë, thotë zëdhënësi i Shërbimit Doganor të Kosovës, Adriatik Stavileci. Sipas tij, ekipet lëvizëse të Shërbimit Doganor të Kosovës të vendosura në veri të vendit, po bëjnëpërpjekje për të parandaluar kontrabandën e mallrave në këtë pjesë. Megjithatë zëdhënësi Stavileci tha se humbjet që po i shkaktohen buxhetit të Kosovës nga mosfunksionimi i dy pikave doganore konsiderohen mjaft të mëdha.

"Sa i përket humbjeve të buxhetit nga mosfunksionimi i dy pikave doganore në veri të Kosovës, nuk mund të themi se kemi një përllogaritje të saktë, sepse nuk posedojmë të dhëna të sakta se çka futet në vendkalimet kufitare pasi nuk kemi staf atje. Nëse e bëjmë një përllogaritje prej shkurtit deri tani, ne vlerësojmë se dëmet janë mbi 8 milionë euro," tha zëdhënësi i doganave në Kosovë, Adriatik Stavileci.

Shkatërrimi i dy pikave doganore në veri të Kosovës, është pasuar me braktisjen e vendeve të punës nga më shumë se 40 oficerët doganorë serbë, të cilët e kanë zgjedhur këtë mënyrë për të shprehur mospajtimin e tyre me pavarësinë e Kosovës.