Fatos Ahmati Korrespondent i BBC-së në Tiranë

	A do të gjejë gjuhë të përbashkët me partnerët në koalicion?

Kryeministri Sali Berisha ka nisur bisedimet me partitë aleate për të ndërrmarrë ndryshimet e nevojshme në qeverinë e tij, bënë të ditur burime pranë qeverisë.

Në vendin vakant të zv/kryeministrit pritet të caktohet Genc Pollo, aktualisht ministër i Arsimit dhe Shkencës dhe vendin e tij mendohet ta zërë nënkryetari i parlamentit Fatos Beja.

Me këto ndryshime republikanët që para tragjedisë së Gërdecit kanë zotëruar portofolin e ministrit të Mbrojtjes, pritet të kthehen në qeveri duke marrë postin e ministrit te Shëndetësisë.

Kandidatja e tyre është mjekja Anila Godo, vajza e udhëheqësit të njohur republikan Sabri Godo. Ende nuk dihet se çfarë posti do të mbajnë demokristianët, të cilët këto ndryshime i presin të përçarë.

Kjo është e katërta herë që kryeministri Berisha ndërmerr ndryshime në qeverinë e tij që kur erdhi në pushtet, tre vjet më parë.

Miratimi i tyre do të kërkojë shumicë votash në parlament të cilat zoti Berisha duket se I ka siguruar. Duket se ai llogarit edhe në grupimin më të ri parlamentar, atë të qendrës, deputetët e të cilit më parë ishin me opozitën.