Kosovarët festojnë në sheshin Skënderbej, Tiranë.

Në delegacionin kosovar, i pari që viziton Shqipërinë pas shpalljes së pavarësisë dhe që kryesohej nga kryetari i parlamentit të Kosovës, Jakup Krasniqi, mori pjesë edhe ministri i Transporteve i qeverisë së Kosovës Fatmir Limaj.

Zoti Limaj i tha BBC-së në shqip se njohja ndërkombëtare e shtetit të Kosovës për momentin është një nga sfidat kryesore.

Jemi shumë të kënaqur me ecurinë e deritanishme.   Fatmir Limaj, ministri kosovar i Transporteve

"Jemi shumë të kënaqur me ecurinë e deritanishme," tha zoti Limaj, ndërsa shtoi se po synohet anëtarësimi në disa mekanizma ekonomikë ndërkombëtarë sikurse janë FMN-ja dhe Banka Botërore.

Ministri i Transportit i Kosovës tha se njohja e pavarësisë është e mirepritur nga të gjitha vendet, por ajo merr një kuptim të veçantë kur bëhet nga vendet fqinje.

Për zotin Limaj ka qënë e kuptueshme sjellja e vendeve si Kroacia dhe Maqedonia, por tha ai "tani ato duhet të hedhin hapin e njohjes së Kosovës."

Kujdes për pakicat

Në forum mjaft prej të pranishmëve vlerësuan se një nga sfidat e Kosovës do të jetë edhe qëndrimi ndaj minoriteteve, veçanërisht ndaj minoritetit serb.

Ndërtimi i marrëdhenieve me shtetin shqiptar është një nga interesat parësore të Kosovës   Fatmir Limaj, ministri kosovar i Transporteve

Zoti Limaj tha me këtë rast se "ka marrë fund koha kur në Kosovë ka patur qytetarë të rendit të dytë. Kosova do tu japë shanse të barabarta të gjithë qytetarëve të saj" tha ai.

Ekonomia sfidë

Por padyshim një nga sfidat më të mëdha për Kosovën do të mbetet zhvillimi ekonomik i saj.

Me një ekonomi kryesisht të varur nga shkëmbimet tregëtare veçanërisht me vendet fqinje, ministri kosovar i Transporteve Limaj thotë se do të synohet krijimi i një ekonomie të tregut të lirë, por edhe do të vendosen prioritete bashkëpunimi me vendet fqinje.

"Ndërtimi i marrëdhenieve me shtetin shqiptar është një nga interesat parësore të Kosovës” tha zoti Limaj.

Pak muaj më vonë, në qershor, komuniteti ndërkombëtar pritet të organizojë një konferencë donatorësh për Kosovën.

Zoti Limaj thotë se synimi i autoriteteve kosovare është të thithin rreth 1 miliardë dollarë investime.

Ndër projektet ai veçoi ato të infrastrukturës, ku më kyesoret janë segmentet rrugore Morinë–Prishtinë dhe Prishtinë–Shkup.