UNMIK-u thotë se hapja e zyrës shënon një provokim të Beogradit.

Zyrtarë të misionit ndërkombëtar në Kosovë thanë se hapja e zyrës shënon një provokim të Beogradit zyrtar, në kundërshtim me zotimet për përmbajtje nga aktet provokuese.

Ministri serb për Kosovën, Sllobodan Samarxhiq, ditë më parë hapi një zyrë administrative në veri të Mitrovicës, pa lejen e autoriteteve në Kosovë.

'akt nxitës'

Mirëpo, autoritetet vendase e kanë quajtuar akt nxitës hapjen e zyrës serbe dhe kanë ripërsëritur përkushtimin për përmbajtje nga aktet e dhunës.

Ato kanë thënë se do të ndërmarrin veprime të caktuara vetëm në bashkëpunim me faktorin ndërkombëtar.

Në Kosovë do të ketë vetëm institucione legjitime të Kosovës... nuk do të ketë vend për struktura paralele jolegjitime   Hashim Thaçi

Kryeministri i mandatuar, Hashim Thaçi, ka thënë se në Kosovë nuk do të ketë struktura paralele.

"Në Kosovë do të ketë vetëm institucione legjitime të Kosovës, do të kemi bashkëpunim të ngushtë me zyrën civile ndërkombëtare dhe NATO-n. Nuk do të ketë vend për struktura paralele jolegjitime," tha zoti Thaçi.

Reagimet serbe

Por përfaqësuesit e serbëve të Kosovës thanë se nuk u besojnë institucioneve kosovare dhe nuk ka asnjë arsye, sipas tyre, pse të mos vazhdojë edhe më tutje funksionimi i institucioneve paralele serbe në veri të Kosovës.

Pjesa e veriut të Kosovës vazhdon të jetë e ndarë dhe autoritetet ndërkombëtare e ato vendase në tetë vjetët e kaluara nuk kanë arritur të vendosin kontrollin.

Serbët e veriut ndërkaq kanë paralajmëruar se në rast të pavarësimit të Kosovës, do të kërkojnë ndarjen e veriut të saj.