Burns kërkon përparim për Kosovën

Nënsekretari amerikan i shtetit, Nicholas Burns, i tha sot BBC-së gjatë një vizite të shkurtër në Prishtinë se SHBA-ja do të vazhdojë të jetë e angazhuar plotësisht në procesin e zgjidhjes së problemit të Kosovës.

"Nëse OKB-ja vendos ne do të përkrahim bisedimet për statusin përfundimtar," tha nënsekretari amerikan i shtetit pas takimeve në prishtinë me shefin e misionit të OKB-së, Soren Jessen-Petersen, dhe udhëheqësit e institucioneve të Kosovës, presidentin Ibrahim Rugova, kryeministrin Bajram Kosumi dhe kryetarin e Kuvendit, Nexhat Daci.

Zoti Burns tha se qëndrimi i qeverisë amerikane është se viti 2005 duhet të jetë vit i ndryshimeve dhe se në Kosovë nuk duhet të vazhdojë status quo-ja.

"Duhet të ketë lëvizje përpara që njerëzit e Kosovës të përcaktojnë të ardhmen e tyre," tha ai.

"Një përparim më i madh duhet të bëhet këtu në decentralizim, në procesin e kthimit të refugjatëve, në veçanti të atyre të komunitetit serb, në procesin e pajtimit, në marrëdhëniet ndërmjet pakicës serbe dhe shumicës, si dhe pakicave të tjera," ka thënë zoti Burns duke theksuar se një përparim i këtillë mund të bëhet vetëm nëse ekziston një shpirt kompromisi.

Zyrtari i lartë amerikan tha se mesazhi që ai solli në Prishtinë, është mesazh mbështetjeje.

"Ne do të vazhdojmë të jemi të përfshirë në masë të madhe në proces së bashku me OKB-në, BE-në, që të shohim se drejtësia është vendosur këtu," tha ai.

"Ne nuk kemi ardhur me ndonjë plan ose me ndonjë rezultat të caktuar, por ne jemi miq të të gjithë njerëzve të këtij vendi," tha zoti Burns.

Vizita e zotit Burns në Kosovë, realizohet vetëm pak kohë pas prezantimit të tij në Kongresin amerikan të një strategjie për zgjidhjen e problemit të Kosovës.