Jessen-Petersen shpreson që Kryqi i Kuq të ndihmojë për të zhdukurit

Zyrtarë të lartë të UNMIK-ut thanë se takimet e shefit të tyre në Gjenevë me përfaqësues të lartë të organizatave të ndryshme humanitare të OKB-së kishin si qëllim angazhimin e mëtejmë të tyre në ndihmë Kosovës.

Në veçanti takimi i tij me përfaqësuesë të Kryqit të Kuq Ndërkombëtar, në mesin e të cilëve edhe me të dërguarin për Kosovën, Francois Stamm, thuhet se shënon një hap konkret në zgjidhjen e çështjes së personave të zhdukur gjatë luftës në Kosovë.

Ne shpresojmë se do të mund të ecim përpara drejt zgjidhjes shumë shpejt me ndihmën e Kryqit të Kuq Ndërkombëtar   S Jessen-Petersen, shef i UNMIK-ut

Jessen-Petersen e ka cilësuar këtë çështje me dimensione të thella humanitare duke nënvizuar se shumë familje të personave të zhdukur po vuajnë tash e një kohë të gjatë.

Çështja e të zhdukurve ka mbetur e pazgjidhur që pas luftës në Kosovë, dhe vlerësohet se mbi 3500 persona, prej të cilëve 2500 janë shqiptarë, konsiderohen si të zhdukur.

Kryqi i Kuq Ndërkombëtar ka luajtur një rol të rëndësishëm në Kosovën e pasluftës, në veçanti në mbledhjen e shënimeve dhe mbajtjen e lidhjeve mes Beogradit zyrtar dhe Prishtinës rreth çështjes së personave të zhdukur.

I dërguari i kësaj organizate ndërkombëtare, Francois Stamm ishte caktuar gati një vit më parë kryesues i bisedimeve ndërmjet Prishtinës dhe Beogradit për çështjen e të zhdukurve, bisedime këto që u ndërprenë pas trazirave të dhunshme të muajit mars në Kosovë, që lanë pas vetes të vrarë e të plagosur dhe shumë dëme materiale.

"Ne shpresojmë se do të mund të ecim përpara drejt zgjidhjes shumë shpejt me ndihmën e Kryqit të Kuq Ndërkombëtar," tha Jessen-Petersen duke e cilësuar çështjen e të zhdukurve një çështje shumë humanitare e cila sipas tij nuk duhet të mbetet peng i zhvillimeve politike.

Shefi i UNMIKU-ut ndërkaq, çështjen e të zhdukurve do ta ketë pjesë të axhendës së bisedimeve edhe me zyrtarët e Beogradit ditën e hënë, dhe UNMIK-u beson se bisedimet e drejtëpërdrejta për këtë çështje mund të ndërtojnë mirëbesimin ndërmjet komuniteteve në Kosovë.

Zyrtarët e misionit të OKB-së thonë se zgjidhja e këtij problemi do të sillte rezultate konkrete edhe në kthimin e trupave të personave të zbuluar nëpër varreza dhe zvogëlimin e vuajtjeve të familjeve.

Rreth një mijë trupa të shqiptarëve të vrarë gjatë luftës janë zbuluar në tri varreza masive në Serbi ku ishin dërguar në kuadër të përpjekjeve të forcave serbe të sigurimit për të fshehur gjurmët e krimeve në Kosovë.

Deri tash vetëm një e treta e trupave janë kthyer në Kosovë.

Por bisedimet në Beograd ndërmjet zotit Jessen-Petersen dhe kryeministrit serb Vojisllav Koshtunica, thonë në UNMIK, duhet të veçojnë problemin e personave të zhdukur.

Tash për tash nuk dihet ndërkaq se kur do të mund të rifillonte një dialog për këtë çështje, por zyrtarët ndërkombëtarë besojnë se pas 17 janarit, shumë shpejt mund të vendoset një datë e caktuar.

Madje ata thonë se bisedimet për të zhdukurit as nuk duhet të përfshihen në kuadër të bisedimeve për çështjet teknike, të filluara pas takimit në Vjenë më shumë se një vit me parë.