Botuar: E mërkurë, 28 korrik 2004 - 16:19 CET

Kuvendi miraton 'Kushtetutën e Përkohshme'

Megjithë kundërshtimin e UNMIK-ut Kuvendi i Kosovës ka miratuar 38 ndryshime në Kornizën Kushtetuese.

Deputetët shqiptarë të Kuvendit të Kosovës kanë vendosur që ta quajnë dokumentin themeltar Kushtetutë të Përkohshme të Kosovës.

Anëtari i kryesisë së Kuvendit, Bajram Kosumi, i tha BBC-së se me ndryshimet e reja parashihet edhe referendumi i popullit të Kosovës për të ardhmen e tij.

Është thelbësore futja e institucionit të referendumit.   Bajram Kosumi, anëtar i kryesisë së Kuvendit të Kosovës

"Me ndryshimet në Kornizën Kushtetuese, tash mund të themi edhe në Kushtetutën e Përkohshme të Kosovës, është synuar që të bëhet bartja e kompetencave nga UNMIK-u, tek institucionet demokratike të Kosovës," tha ai.

"Është thelbësore futja e institucionit të referendumit," tha zoti Kosumi.

Kuvendi thotë se ndryshimet janë pjesë e përgjegjësisë së tij dhe me ndryshimet parashihet edhe krijimi i ministrive të reja në qeverinë e Kosovës.

Deputetët kosovarë nuk kanë arritur të harmonizojnë qëndrimet për katër amandamente që kanë të bëjnë me pakicat para se të parlamenti të mbyllet për periudhën e verës.

Korniza kushtetuese u miratua me një marrëveshje jo unanime në vitin 2000, dhe punët për ndryshimin e saj filluan në tetor të vitit të kaluar me kërkesë të qeverisë së kryeministrit Bajram Rexhepi.

UNMIK-u kundër

Ndryshimet kushtetuese janë të papranueshme për misionin e OKB-së në Kosovë, thonë zyrtarë të UNMIK-ut në Prishtinë.

Siç e kemi thënë në vazhdimësi disa nga ndryshimet do të konsiderohet e disa jo   Metchlide Henneke, zëdhënëse e UNMIK-ut

Sipas tyre, nuk është në kompetencat e Kuvendit të bëjë ndryshimin e Kornizës Kushtetuese.

Megjithatë, një zëdhënëse e UNMIK-ut në Prishtinë, Metchlide Henneke, tha se administrata ndërkombëtare do të shqyrtojë ndryshimet e propozuara nga Kuvendi dhe do të dalë me qëndrimin e saj.

"Ne po presim të marrim dokumentin nga Kuvendi dhe do ta shikojmë atë," tha zëdhënësja e UNMIK-ut.

"Siç e kemi thënë në vazhdimësi disa nga ndryshimet do të konsiderohet e disa jo," tha zëdhënësja Henneke.

Ndryshimet në Kornizën Kushtetuese i kanë kundërshtuar edhe përfaqësuesit e pakicës serbe.

Kundraproduktiv

Eksperti juridik, profesor Riza Smaka, thotë se Kuvendi ka nisur një punë për të cilën "nuk është as kompetent, as i autorizuar e as që mund ta bëjë me procedurat që ka menduar".

Në kontekstin e realitetit aktual, vlerësoj se nuk është dashur të bëhet kjo punë kur dihet që në fillim se nuk do të ketë kurrfarë efekti.   profesor Riza Smaka

Sipas profesor Smakës, nuk është koha e përshtatshme për ndryshimin e Kornizës Kushtetuese.

"Në kontekstin e realitetit aktual, vlerësoj se nuk është dashur të bëhet kjo punë kur dihet që në fillim se nuk do të ketë kurrfarë efekti, mund të ketë vetëm kundërefekte dhe ky aktivitet pa fije dyshimi do të jetë krejtësisht kontraproduktiv," tha profesor Smaka.

Kuvendi i Kosovës e ka nisur procedurën e ndryshimit të Kornizës Kushtetuese në tetor të vitit të shkuar me kërkesën e qeverisë së Kosovës.

Qe formuar një komision parlamentar për të punuar në këtë process, sic thuhej, në kontakte të vazhdueshme me UNMIK-un.

Profesor Smaka thekson se para se të procedohej me ndryshimet në Kornizën Kushtetuese, do të duhej që qeveria të përgatiste qindra akte ligjore.