Botuar: E mërkurë, 21 korrik 2004 - 18:06 CET

Surroi premton ndryshime në zgjedhjet e tetorit

Themeluesi dhe bartësi i listës së Nismës Qytetare “Ora”, Veton Surroi, ka deklaruar se Kosova nuk duhet të kërkojë pëlqim për statusin e saj nga Beogradi, por pavarësia mund të vijë vetëm nëse krijohet në formë strukturore brenda Kosovës.

Këto deklarata zoti Surroi i bëri në një bisedë me BBC-në dhe shtoi se Prishtina duhet të hapë bisedimet me ofertën për Beogradin zyrtar që ai të bëhet partner në zgjidhjen e problemeve të popullatës serbe në Kosovë.

Zoti Surroi tha se zgjedhjet në Kosovë do të sjellin një politikë më dinamike të kosovarëve.

Nisma qytetare “Ora” u krijua kohë më parë dhe vec zotit Surroi një emër tjetër në listën e saj është edhe analisti Ylber Hysa.

Arbër Vllahiu e pyeti zotin Surroi fillimisht se pse pikërisht në këtë kohë nisma qytetare

Z. Surroi: - Së pari është cështja e një përgjegjësie qytetare. Mendoj se kështu si ecën Kosova nuk do të mund t’i realizojë as nevojat elementare të brendshme, të funksionimit të një shteti dhe do ta ketë shumë më vështirë ta realizojë aspiratën për përmbylljen e statusit përfundimtar me pavarësi. Duke e parë një gjendje e cila pas një periudhe të gjatë stagnimi po hyn në degradim kam menduar se është obigim imi dhe i gjithë qytetarëve të intereseuar dhe që mund të japin një kontribut që të hyjmë në procesin zgjedhor në mënyrë që të krijojmë kushte për një administrim më të mirë në Kosovë.

BBC: Ju thoni se është obligim qytetar. Por ka patur edhe parti të tjera, nisma qytetare që zakonisht kanë konkurruar në zgjedhje. A nuk mendoni se është stërmbushur skena politike kosovare?

Z. Surroi: - Jo nuk mendoj se është stërmbushur. Ajo është e stërmbushur me injorancë dhe padituri dhe në shumë raste, sic e këmi parë në këto dy tre vjetët e fundit është stërmbushur edhe me një afinitet drejt korrupcionit dhe të gjitha atyre dukurive të cilat nuk dëshironim t’i kishim dhe imagjinonim se nuk do të na vinin në kohën kur ishim të pushtuar nga forcat e Milosheviqit. Unë mendoj se në këtë skenë poltike sjellim afinitetin e politikave d.m.th. afinitetin e bërjes së politikave ekonomike, politikave zhvillimore, e krijimit të një sistemi funksional në Kosovë. Mendoj se kjo strukturë e deritanishme politike në Kosovë është pak a shumë e vlerësuar si e dështuar dhe ka shumë gjëra që kanë mundur të bëhen e nuk janë bërë. Mos të harrojmë se kjo është struktura politike e cila nuk ka arritur të merret vesh as për të formuar qeverinë por është dashur që dikush i huaji të vijë ta krijojë qeverinë dhe t’ju jap programin qeveritar.

BBC: Duket sikur e vlerësoni këtë politikë shterpe. Por zgjedhjet janë afër, Kosova është përpara negociimit të statusit të saj politik, pra ku është në këtë mes Kosova me gjithë këtë shterpësi politike që ju e përmendni?

Z. Surroi: - Jemi para ndryshimeve. Unë jam i bindur se zgjedhjet e ardhshme do të sjellin ndryshime në Kosovë, do të sjellin një politikë më dinamike të vetë kosovarëve dhe jemi para ndryshimeve brenda bashkësisë ndërkombëtare brenda koncepteve të bashkësisë ndërkombëtare dhe këto duhet shfrytëzuar. Por u ndryshua nuk u ndryshua bashkësia ndërkombëtare ajo që duhet të ndryshojë janë shqiptarët.

BBC: Në cfarë forme duhet të ndryshojnë ata?

Z. Surroi: - Duhet të ndryshojnë në bërjen e politikave, në marrjen e nismave në diktimin e ritmit zhvillimor politik dhe ekonomik në Kosovë dhe jo në pritjen që dikush duhet të vijë dhe të na sjell zgjidhje neve.

BBC: Zoti Surroi dialogu ndërmjet shqiptarëve dhe serbëve në zgjidhjen e statusit politik të Kosovës duket të jetë i pashmangshëm. Ju keni numëruar disa arsye pse Kosova do të duhej të futej në disa forma të tjera me Serbinë.

Z. Surroi: - Unë mendoj se duhet biseduar jo për shkak të statusit, sepse nuk mendoj se Kosova duhet të kërkojë leje apo pëlqim për statusin e saj nga Beogradi. Këtë te drejtë Beogradi e ka konsumuar kaherë, me luftën në Kosovë. Por unë mendoj se ne kemi shumë cështje që duhet të bisedojmë me Beogradin e në rradhë të parë kjo ka të bëjë me të gjitha pasojat e apartheidit dhe të luftës në Kosovë. Ne kemi jo vetëm shkatërrime në jetërat e njerëzve por edhe shkatërrime materiale dhe këto janë obligim i Beogradit. Kemi probleme me fondet pensionale, kemi probleme të kësaj natyre edhe në fushat e tjera dhe posacërisht në këtë fazë duhet të hapen bisedimet me ofertën për Beogradin zyrtar që të bëhet partner për zgjidhjen e halleve dhe telasheve të popullatës serbe në Kosovë apo për kthimin e tyre. Ne duhet të krijojmë marrëdhënie partneriteti, ndonëse ai ndonjëherë do të mungojë nga ana e Beogradit, por duhet të bëhet e qartë se Beogradi ndonëse ka të drejtë të interesohet për popullatën serbe këtë të drejtë duhet ta konsumojë brenda kornizave të Marrëveshjes së Helsinkit, ku dihet qartë përgjegjësia e shtetit amë ndaj minoritetit.

BBC: Zoti Surroi duket sikur pavarësinë e Kosovës e keni bërë cështje të kryer tashmë?

Z. Surroi: - Unë nuk them se është e zgjidhur, por duhet të punohet si të jetë e zgjidhur. Çështja është se kjo pavarësi mund të vijë vetëm nëse krijohet në formë strukturore brenda vendit. Me ofertën tonë politike këtë do ta bëjmë të mundur. Cështja nuk është a do të kërkojmë nga dikush leje për pavarësi, por cështja është a do t’i krijojmë kushtet që ajo të pësojë një zhvillim natyral.