UNMIK-u shpreh optimizëm se serbët e Kosovës do të marrin pjesë në zgjedhje

Zyrtarë të UNMIK-ut thanë të mërkurën në Prishtinë se pjesëmarrja e përbashkët e shqiptarëve dhe serbëve në disa aktivitete të ditëve të fundit është mjaft opimiste.

Një zëdhënëse e UNMIK-ut në Prishtinë, Metchilde Henneke tha se administrata ndërkombëtare është duke biseduar në vazhdimësi me subjektin kryesor politik serb në Kosovë, koalicionin “Kthimi”, që ta bindë atë të marrë pjesë në zgjedhjet e sivjetme.

“Përfaqësuesit politikë serbë javët e fundit janë bërë aktivë në skenën politike në Kosovë. Ata janë vëzhgues në grupin punues për decetralizimin, po marrin pjesë në grupin këshillues të sigurisë si dhe kanë nënshkruar deklaratën e përbashkët në zyrën amerikane. Prandaj ka optimizëm në anën tonë se serbët mund të marrin pjesë në zgjedhje, ndonëse ende nuk kemi sinjale të qarta për këtë”, tha zëdhënësja Henneke.

Kryeministri i Kosovës, Bajram Rexhepi, sikundër edhe institucionet e tjera vendore, vlerësojnë se koalicioni “Kthimi” po përgatitet gradualisht që të hyjë në garën zgjedhore.

Kjo si rezultat i takimeve të shpeshtuara mes udhëheqësve shqiptarë e serbë në Kosovë me ndërmjetësimin e autoriteteve ndërkombëtarë e, në veçanti, pas një pajtueshmërie në zyrën amerikanë të të dyja palëve për krijimin e një ministrie të veçantë për komunitetet dhe kthimin e të zhvendosurve.

“Me gjasë serbët mendojnë seriozisht të marrin pjesë në zgjedhje. Ata po bëjnë përgatitjen, por vendimin përfundimtar do ta marrin më vonë”, tha kryeministri Rexhepi.

Edhe vetë përfaqësuesit e subjektit kryesor serb, kolacionit “Kthimi” kanë lënë të hapur mundësinë e pjesëmarrjes në zgjedhjet parlamentare që do të mbahen më 23 tetor.

Mirëpo, para se të marrin një vendim të prerë, ata kërkojnë që të mbështetet plani i Beogradit për decetralizimin e pushtetit në Kosovë.

Ky plan parasheh krijimin e pesë rajoneve autonome për serbët e Kosovës si dhe rindërtimin me kohë të të gjitha objekteve të serbëve që janë shkatërruar gjatë trazirave të marsit.

Oliver Ivanoviç nga koalicioni “Kthimi”, thotë se Beogradi do të ketë një rol të madh në vendimin e serbëve të Kosovës për pjesëmarrje në zgjedhje.

“Ne nuk e kemi marrë ende vendimin a do të marrin pjesë në zgjedhje. Kjo do të varet nga krijimi i një klime pozitive e cila gjithsesi do të krijohet, por një ndikim shumë të madh do të ketë qëndrimi unik i Beogradit, i cili mund të na ndihmojë. Mendoj se ende kemi kohë të vendosim për një gjë të tillë”, tha Oliver Ivanoviç.

Në fakt, afati zyrtar për t'u regjistruar në Sekretariatin e Komisionit Qëndror të Zgjedhjeve ka skaduar para afro një muaji dhe koalicioni “Kthimi” nuk ishte në listën e konkurruesve.

Në qoftë se ky subjekt politik do të pranojë të hyjë në garën zgjedhore të sivjetme, atëherë Komisioni Qëndror Zgjedhor do të vendosë në një mbledhje të veçantë nëse do ta pranojë kërkesën e koalicionit “Kthimi”, tha për BBC-në kryeshefi i Sekretariatit të Komisionit Qëndror të Zgjedhjeve, Adnan Merovci.

“Komisionit Qëndror të Zgjedhjeve i takon edhe në raste specifike të ndryshojë këto afate”, u shpreh z. Merovci.

Zvarritja e vendimit të serbëve për pjesëmarrje në zgjedhje mund të jetë pasojë edhe e përçarjeve në mesin e përfaqësuesve serbë të Kosovës.