Zëdhënësi i UNMIK-ut, Jeff Bieley, i tha BBC-së se miratimi i propozimeve për ndryshimet në Kornizën Kushtuese nuk ështe punë e Kuvendit, dhe se kuvendi duhet te merret me miratimin e ligjeve për zbatimin e standardeve.

Me zotin Bieley bisedoi Arbër Vllahiu dhe fillimisht e pyeti se cili është reagimi i UNMIK-ut ndaj vendimit të Kuvendit të Kosovës për Kornizën Kushtetuese?

Bieley: Sikur e kemi thënë më heret përparësi jona kryesore është përqëndrimi në zbatimin e standardeve dhe nuk është koha që këto ndryshime të propozohen nga Kuvendi. Ne po presim të shohim se çfarë ndryshimesh ata kanë miratuar sot dhe ne do të kemi më shumë reagime më vonë, tha zëdhënësi i misionit të OKB-së në Kosovë.

BBC: Përse reagime të tilla kur dihet se Kuvendi ka miratuar vetëm propozimet për ndryshime dhe jo ndryshimet në Kornizën Kushtetuese?

Bieley: Jo, fatkeqësisht kjo është vetëm një çështje teknike dhe unë nuk isha në sesion e nuk kisha mundësi të flas me asnjë zyrtar nga UNMIK-u. Por sikur e kemi thënë më herët Kuvendi duhet të merret me ligjet që kanë të bëjnë me zbatimin e standardeve. Dhe sikur e tha edhe ushtruesi i detyrës së Përfaqësuesit të Posaçëm të OKB-së, zoti Brayshow, shpresojmë se Kuvendi nuk do ta zhgënjejë bashkësinë ndërkombëtare.

BBC: Por ai mund të zhgënjejë qytetarët që kanë votuar për të?

Bieley: Mendoj se njerëzit që kanë votuar për Kuvendin janë të interesuar gjithashtu që të shohin përmbushjen e standardeve, të cilat janë përparësi për Kosovën.

BBC: A po bën Kuvendi një punë që nuk është në interes të askujt në Kosovë?

Bieley: Unë jam i sigurt se Kuvendi ka kapacitete që të bëjë ndryshime në Kornizën kushtetuese dhe sipas saj kjo procedurë është e lejueshme. Sikur e ka bërë publike edhe zoti Brayshow në takim me kryetarin e Kuvendit, ka disa fusha ku mund të lejohen ndryshimet dhe njëra nga to është zgjatja e mandatit të përbërjes së Kuvendit nga tre në katër vjet pas zgjedhjeve të ardhshme. Por fushat e tjera që janë të rezervuara për UNMIK-un dhe Kuvendi nuk duhet të ecë në këtë drejtim.

BBC: A do ta shpall UNMIK-u të pavlefshëm votimin e sotëm në Kuvend?

Bieley: Fatkeqësisht unë nuk kam ende një reagim të zyrtarëve të UNMIK-ut për vendimin e sotëm.