Propozimet u miratuan nga dy të tretat e deputetëve të pranishëm

Kuvendi miratoi 38 amendamente, me dy të tretat e votave të deputetëve të pranishëm.

Kuvendi hoqi dorë nga miratimi i amendamenteve që rregullojnë pjesëmarrjen e pakicave në Kuvend meqenëse përfaqësuesit serb i bojkotojnë mbledhjet që nga trazirat e marsit.

Amendamenti kryesor është që Korniza Kushtetuese të zëvendësohet me kushtetutë të përkohshme, ndërkaq emërtimi Institucione të Përkohshme Vetëqeverisëse të Kosovës të zëvendësohet me Institucionet Demokratike të Kosovës.

Një tjetër amendament thotë se Kosova është vend nën administrimin ndërkombëtar dhe nën administrimin e institucioneve demokratike të Kosovës.

Ndër propozimet e tjera vlen të veçohet edhe parimi që Komunat jane njësi themelore administrative dhe se kufijtë e komunave jane të pandryshueshëm.

Fatmir Sejdiu, anëtar i komisionit për ndryshime në Kornizën Kushtetuese nga Lidhja Demokratike e Kosovës (LDK), thotë për BBC-në se Kuvendi ka bërë punën e tij dhe ka përmbushur një obligim të votuesve.

"Këto janë më shumë amendamente, por nga kjo që është miratuar mund të themi se esenciale është se është bërë një precizim i mirë i fushave që janë bartur në institucionet e Kosovës që kanë qenë ngatërrime të mëhershme apo dykuptimësi," tha z. Sejdiu.

I pyetur nëse tash ishte koha për ndryshimin e emërtimit nga Korniza Kushtetuese në Kushtetutë të Përkohshme, zoti Sejdiu tha se besonte që po.

"Në hap e sipër ne do të bëjmë përpjekje, natyrisht edhe në bashkëpunim me ndërkombëtarët, dhe kjo do të sillet në përputhje me ecuritë që kanë të bëjnë me statusin përfundimtar të Kosovës apo pavarësinë që ne mëtojmë ta realizojmë," tha z. Sejdiu.

Z. Sejdiu tha se Kuvendi në vazhdimësi ka pasur biseda me UNMIK-un rreth amendamentimit të Kornizës Kushtetuese dhe do të vazhdojë të mbajë ato.

"Në bisedat e fundit që kishim me zyrën ligjore të UNMIK-ut na është thënë se askush nuk e konteston ndryshimin e këtij dokumenti , por mos të shkohet esencialisht, dmth në ndryshime thelbësore, por sido që të jetë ne jemi në përpjekje të mbështetjes edhe nga bashkësia ndërkombëtare," theksoi deputeti Sejdiu.

Reagimi i UNMIK-ut ka qenë ai i mëparshmi se ndryshimet në Kornizën Kushtetuese nuk janë kompetencë e Kuvendit të Kosovës por e Këshillit të Sigurimit të OKB-së.

Korniza Kushtetuese është dokumenti më lartë juridik në Kosovë. Ajo është miratuar pak kohë pas vendosjes së misionit të OKB-së në Kosovë, në vitin 2000.

Ky dokument është miratuar si i përkohshëm dhe pa pëlqimin e të gjithëve.

Institucionet vendore të Kosovës disa herë kanë kërkuar ndryshimin e Kornizës Kushtetuese, duke e parë atë si frenuese të proceseve në Kosovë, mirëpo pa sukses.

Edhe votimi i sotëm pro ndryshimeve të Kornizës Kushtetuese nuk do të thotë se ky dokument do të nxjerret jashtë lojës, por vlerësohet se ky hap do të ketë një rëndësi të posaçme, pikërisht tash, kur është hapur diskutimi për ndryshime në misionin e OKB-së në Kosovë.