Botuar: E enjte, 24 qershor 2004 - 19:40 CET

Riaktivizohen grupet për Standardet

Vetëm një ditë pas një takimi formal të udhëheqësve politikë e institucionalë të Kosovës me përfaqësues të pakicës serbe të realizuar në përfaqësinë e SHBA-së në Prishtinë ka rifilluar puna e grupeve punuese për zbatimin e standardeve.

Të enjten është mbledhur grupi punues për sundimin e ligjit dhe ai për kthimin e pjesëtarëve të pakicave, me theks të posaçëm të pakicës serbe, mirëpo përfaqësuesit e kësaj të fundit nuk kanë marrë pjesë në to.

Oliver Ivanoviq tha se shpresonte se serbët do të vendosin që të kthehen në punën e institucioneve të Kosovës e kjo nënkupton kthimin e tyre edhe në grupet punuese për zbatimin e standardeve.

Koordinatori i qeverisë për zbatimin e standardeve, Zenun Pajaziti ndërkaq i tha BBC-së se në këtë takim të dy grupeve punuese, përveç UNMIK-ut dhe qeverisë, morën pjesë edhe përfaqësues të Grupit të Kontaktit, të cilët siç tha 'kanë dhe do të kenë një rol shumë të madh në mbarëvajtjen e grupeve punuese dhe në përgjithësi në përmbushjen e standarteve,' tha zoti Pajaziti duke cilësuar si shqetësues faktin që serbët nuk po marrin pjesë në punimet e këtyre grupeve.

Z. Pajaziti theksoi se ndërkohë qeveria dhe UNMIK-u po bisedojnë me serbët që t'i bindin që edhe ata të jenë pjesë e këtij procesi.