Gjendja është ende e tensionuar në Kosovë

Zëdhënësi i policisë Derek Chappel thotë se mungesa e saktësisë në nuimrin e viktimave ka ardhur përshkak se incidentet kanë ndodhur në vende të ndryshme dhe viktimat janë derguar në spitale të ndryshme.

Ai tha se deri tani janë evidentuar 600 të plagosur prej të cilëve 22 janë rëndë. Në mes të të lënduarve janë edhe 100 policë, njëri prej të cilëve është qëlluar me armë zjarri në këmbë.

Duke bërë një blanc të dëmeve të shkaktuara, zoti Chappel tha se gjatë dhunës janë shkatërruar 16 kisha ortodokse serbe dhe 110 shtëpi serbe.

Qetësi e tensionuar

Situata në Kosovë është e qetë por mjaft e tensionuar. Në kryeqytetin e Kosovës, Prishtinë, vërehen forca të mëdha të policisë dhe të paqëruajtësve ndërkombëtarë.

Tashmë është bërë një gjë farë e zakonshme që në rrugët e Kosovës, të shihen gjithnjë e më shpesh automjete të blinduara të misionit të OKB-së apo të KFOR- it.

Korrespondentja e BBC-së në Mitrovicë thotë se gjendja atje është më e qetë. Nuk ka pasur protesta ndërsa jeta ka filluar të normalizohet.

Trupat e KFOR-it kanë filluar që në mëngjes një aksion të gjerë të kërkimit të armëve të paligjshme në rajonin "Tre Rrokaqiejt" në pjesën veriore të Mitrovicës.

Gjatë këtij operacioni ka pasur disa shpërthime. Gjatë gjithë natës janë dëgjuar të shtëna të shumta në të dy anët e qytetit.

Ura kryesore që ndan dy anët e qytetit, atë shqiptare dhe serbe, dhe një hapësirë e gjërë rreth saj ka kaluar nën kontrollin e forcave të KFOR-it.

Nga zona e mirëbesimit në Mitrovicë të enjten në mbrëmje është evakuar stafi civil ndërkombëtar, i cili është zhvendosur në kampin ushtarak të KFOR-it në Maxhunaj të Vushtrisë.

Ura e përforcuar

Forca të mëdha të njësisë speciale të policisë dhe KFOR-it kanë vendosur kordone disa qindra metra larg urës dhe të gjitha lëvizjet në këtë zonë janë të ndaluara.

Situata ka qenë shumë, shumë e rëndë dhe tani ne jemi në pikën ku çdo skenë mund të shpërthejë.   Gjenerali Xavier Michel i KFOR-it

KFOR-i ka zgjeruar zonën e mirëbesimit edhe te "Tre rrokaqiejt" dhe rrugët që çojnë në këtë lagje. Edhe në këtë pjesë ka filluar të aplikohet ora-policore nga ora 19:00 deri në ora 06:00 të mengjësit.

Përmes një urdhërese KFOR-i i ka këshilluar qytetarët që të mos dalin jashtë dhe të mos qëndrojnë afër dyerve e dritareve.

"Çdo qytetar që bart armë brenda zonës së mirëbesimit, do të qëllohet pa paralajmërim," thuhet në urdhëresën e KFOR-it.

Komandati i brigadës shumëkombëshe veri-lindje, gjenerali Xavier Michel, ka përgënjeshtruar informacionet për vdekjen e një ushtari të tij në Mitrovicë, por ka konfirmuar se gjatë trazirave atje janë palgosur 16 ushtarë, prej të cilëve njëri rëndë.

Gjenerali Michel tha se situata në Mitrovicë është ende e brishtë dhe mund të shpërthejë.

"Mund t'iu them se situata ka qenë shumë, shumë e rëndë dhe tani ne jemi në pikën ku çdo skenë mund të shpërthejë, posa të kemi ndonjë turmë që provon të kalojë lumin Ibër," tha gjenerali Michel.

Kërkime për të mbyturin

Në fshatin Çabër të Zubin Potokut po vazhon aksioni i Trupave Mbrojtëse të Kosovës dhe fshatarëve për gjetjen e trupit të pajetë të fëmijës së tretë, Florent Veselit, i cili bashkë me dy fëmijë të tjerë shqiptarë, humbën jetën tri ditë më parë në lumin Ibër, sipas dëshmitarëve, ndërsa po iknin nga serbë lokalë që po i ndiqnin me një qen.

Ngjarja tragjike në fshatin e vetëm shqiptar në komunën e Zubin Potokut nisi valën e dhunës në tërë Kosovën.

Data e varrimit të fëmijëve të mbytur në lumin Ibër në Çabër ende nuk është caktuar.

Kufomat ndodhen në morgun e Rahovecit dhe sipas familjarëve espertiza e tyre nuk ka përfunduar.

Njoftimet flasin se rrugët në drejtim të Gjilanit dhe Shkupit ende janë të mbyllura në dy fshatrat me popullsi serbe, në Graçanicë dhe në Çagllavicë, megjithëse kryeministri i Kosovës, Bajram Rexhepi, tha se ka marrë premtime për zhbllokimin e tyre.

Njoftohet se forcat amerikane të KFOR- it kanë bllokuar hyrje-daljet për në qytetin e Vitisë, që gjendet në jug-lindje të Kosovës.