Tetëmbëdhjetë vetë kanë vdekur nga përleshjet më të fundit

OKB-ja, NATO dhe ShBA-të kanë bërë thirrje për qetësi pas përleshjeve midis shqiptarëve dhe serbëve.

Protestat e fundit në Kosovë kanë pasur një shtrirje akoma më të madhe në orët e mbrëmjës të së mërkurës.

Protestat kanë qenë më të theksuara në Prishtinë e rrethinat e saj. Shtabi i Krizës i formuar pas situatës së krijuar, të enjten në mëngjes ka njoftuar për të paktën 16 persona të vrarë, ndërkohë që burime nga forcat ndërkombëtare thonë se kjo shifër është më e lartë, 18.

Skënder Murati, shef i shtabit të krizes i tha BBC-së se ka pasur edhe shumë të plagosur.

"Deri në orën dy pas mesnate kemi të konfirmuar 16 të vdekur dhe rreth 600 të plagosur, të cilët po kurohen në qendra të ndryshme spitalore të Kosovës," tha zoti Murati.

Situata është përshkallëzuar edhe gjatë natës së kaluar. Në Prishtinë protestat janë bërë më të dhunshme e janë dëgjuar edhe shpërthime të fuqishme.

Protestuesit, thotë korrespondenti i BBC-së, kanë djegur edhe disa makina të Kombeve të Bashkuara, ndërsa njoftohet edhe për një të vrarë.

Janë djegur edhe disa prona të serbëve nëpër vendbanime të ndryshme të Kosovës. Nuk janë kursyer as disa kisha dhe objekte fetare ortodokse në Prizren, Gjakovë, Pejë, në Ferizaj dhe qytete të tjera.

Pas një takimi të shefit të UNMIK-ut, Hari Holkeri me udhëheqësit e institucioneve e të partive kryesore politike të Kosovës dhe shefat e zyrave të vendeve anëtare të kuintit të akredituar në Prishtinë, është bërë thirrje për dhënien fund të dhunës.

"48 orët e fundit kanë qenë të tmerrshme dhe shokuese për popullin e Kosovës, por dhuna duhet të ndalet, dhe duhet të ndalet menjëherë. Nuk ka anjë arsyetim për ndonjë sulm ndaj të tjerëve ose për akte hakmarrëse. Kurrë nuk mund të ekzistojë një arsye për të sulmuar ose për të ngacmuar fqiun. Aktet e tilla janë të patolerueshme. Ato janë turp për ne të gjithë,"- thuhet në deklaratë.

Ndërkohë edhe kryetari i Kuvendit të Kosovës, Nexhat Daci i ka bërë thirrje qytetarëve për vetëpërmbajtje dhe gjakftohtësi. Por njëherësh ai thotë se pa përcaktimin e statusit të Kosovës marrëdhëniet ndëretnike do të vazhdojnë të jenë të tensionuara. Ai, në një intervistë për BBC-në, riafirmoi angazhimin për ripërcaktimin e statusit të UNMIK-ut.

Shtypi kosovar për protestat

Analisti kosovar, Veton Surroi thotë se për problemin e Mitrovicës duhet të ekzistojë një ofertë, duhet të ekzistojë një zgjidhje.

Ai në një koment të botuar në të përditshmen "Koha Ditore", vlerëson se ngjarjet e djeshme shënojnë "vdekjen tragjike të një politike dhe njerëzve nga ajo. Kosova prej sot po hyn në garën vetëshkatërruese, ku garues janë politika e dështuar dhe dhuna që marrin jeta njerëzish".

Të përditshmet e tjera kosovare, në faqet e para sjellim njoftime me fotografi me pamje trishuese nga zhvillimet e djeshme. E përditshmja "Zëri" vlerëson se "Kosova e 18 marsit është me vite prapa Kosovës së 16 marsit…dhe kjo do ketë pasoja të rënda për të ardhmen e saj".

Ndërkaq "Bota sot" për zhvillimet e djeshme fajëson "terrorin serb që po vepron në Kosovë", ndërsa "Epoka e re" për të gjitha këto zhvillme bën fajtor "strukturat e UNMIK-ut të cilat kanë toleruar strukturat paralele serbe në Kosovë."