Zyrtari i ICG-së thotë se udhëheqja kosovare nuk ka garantuar pakicat

Këto komente për BBC-në i bëri Nicholas Whyat, drejtori i programit për Evropën i Grupit Ndërkombëtar të Krizës (ICG), i cili pohoi se udhëheqësit shqiptarë nuk kanë bërë sa duhet që të sigurojnë se Kosova është vend ku pakicat do të jenë të sigurta.

Ai thotë se ngjarjet e fundit tregojnë një padurim me ngadalësinë që po ecet drejt zgjidhes së statusit përfundimtar të Kosovës.

Arbër Vllahiu bisedoi me zoti Whyat.

BBC: A shënon dërgimi i trupave shtesë të NATO-s në Kosovë një situatë dramatike?
Zoti Whyat: Është e qartë se dje (e mërkurë) kishim prishje të rendit dhe se KFOR-i nuk ishte mundësi të kryente detyrën e tij dhe të mbrojë pakicat në Kosovë. Dhe për këtë më shumë trupa janë të nevojshme dhe më vjen mirë që do të ketë përgjigje të sigurisë nga ana e bashkësisë ndërkombëtare.

BBC: Pra, po shohim se Kosova edhe pas pesë vjetësh është ende e paqëndrueshme?
Zoti Whyat: Është e qartë se udhëheqësit shqiptarë nuk kanë bërë sa duhet që të sigurojnë se Kosova është vend ku pakicat do të jenë të sigurta.

BBC: Por a ka bërë UNMIK-u sa duhet në këto vitet e fundit që të krijojë një qëndrueshmëri, por edhe të rindërtojë Kosovën?
Zoti Whyat: Kombet e Bahskuara janë penguar nga statusi i vështirë ligjor i Kosovës meqë në fakt ajo nuk është një shtet sovran. Derisa të mos zgjidhet sovraniteti do të ketë ngadalësim të nismave ekonomike. Ne duhet të themi se udhëheqësit shqiptarë në Kosovë kanë patur mundësinë gjatë këtyre viteve të pasqyrojnë me kredibilitet Kosovën si një vend ku pakicat do të jenë të sigurta dhe ku njerëzit do të mendonin se investimet janë të sigurta. Këto ngjarje të djeshme (e mërkurë) e kanë dëshmuar të kundërtën dhe nuk ka një argument tani të më bindin.

BBC: Por pse kjo kohë për trazira?
Zoti Whyat: Të jem i sinqertë nuk kemi nevojë të shikojmë larg për të kuptuar se kjo është java e parë e pranverës në Kosovë. Nëse shikoni në historinë e Ballkanit, të gjitha konfliktet serioze filluan në këtë periudhë kohore. Në vitin 2001 Maqedonia, në vitin 1998 Drenica, pastaj 1992 Sarajeva. Zakonisht marsi apo prilli janë muajt ku ka tendosje. Pra, ky është fakti më i rëndësishëm për mua. Por mbi të gjitha ka patur një rritje të padurimit me OKB-në me ndjenjën se gjërat po ecin shumë ngadalë drejt zgjidhjes së statusit përfundimtar të Kosovës. Ka shumë përplasje ndërmjet UNMIK-ut dhe Kuvendit të Kosovës.

BBC: Pra ju parashikoni më shumë përshkallëzime?
Zoti Whyat: Ta shohim. Nëse udhëheqësit e Kosovës luajnë një rol pozitiv dhe t'u thonë njerëzve të tyre se sulmi mbi serbët nuk do të jetë një taktikë e mençur politike, dhe nëse UNMIK-u dhe KFOR-i e rivendosin veten si garantë të sigurisë, mendoj se ka gjasa të mira për ta stabilizuar gjendjen.

BBC: Pak kohë më parë ju keni thënë se Kosovës duhet t'i njihet pavarësia. Çka mendoni tani?
Zoti Whyat: Mendoj se dita e fundit në mënyrë drastike e ka ngritur argumentin e atyre që kërkojnë ndarjen e Kosovës.

BBC: Nëse e mora vesh mirë, ju mendoni se ka ardhur koha tani të flitet për ndarje?
Zoti Whyat: Mendoj se është ende heret të vlerësohet se cili është rezultati i ngjarjeve të orëve të fundit. Mendoj se shqiptarët ë Kosovë duhet të jenë të vetëdijshëm se pasojat e ditës së djeshme (e mërkurë) e përforcojnë argumentin e atyre që thonë se nuk ka siguri për minoritetet që të jetojnë nën udhëheqjen e shqiptarëve.