Protestat vazhdojnë në qytete të Kosovës

Trupat e KFOR-it kanë përdorur gazin lotsjellës dhe plumba plastikë kundër një turme prej disa qindra shqiptarësh tek tregu në pjesën jugore të Mitrovicës.

Masa më pas turma është zhvendosur afër të vetmës kishë ortodokse që ndodhet në pjesën jugore të Mitrovicës. Disa dhjetëra protestues kanë arritur të hyjnë brenda në kishë, prej nga është parë të dalë tym i zi.

Turma e demonstruesve është zprapsur pas ndërhyrjes së forcave të KFOR-it me gaz lotsjellës. Nuk ka njoftime për të lënduar.

Korrespondentët në vendin e trazirave thonë se kanë dëgjuar edhe të shtëna.

Një zëdhënës i UNMIK-ut në Mitrovicë, Gyorgy Kakuk, tha për BBC-në se rreth mesditës situata dukej më e qetë.

Ndryshe nga dita e enjte, numri i protestuesve në Mitrovicë, ishte më i vogël, ndërsa masat e sigurisë ishin më të mëdha.

Forca të shumta të njësive speciale të policisë kanë vendosur barrikada 400 metra larg urës që ndan qytetin duke penguar përpjekjet e protestuesve që të depërtojnë në zonën ku ndodhet administrata e UNMIK-ut dhe stacioni policor, ku nga mbrëmë ka filluar të aplikohet ora policore.

Kuvendi Komunal i Mitrovicës ka mbajtur një mbledhje të jashtëzakonshme, ku ka dënuar trazirat e ditës së mërkurë dhe ka ftuar qytetarët që të jenë gjakftohtë dhe t'i lënë organet komptente që të kryejnë punën e tyre.

Demonstrata të tjera

Në kryeqytetin Prishtinë qindra nxënës të shkollave të mesme e studentë u përleshën me forcat e KFOR-it.

Ndërkohë që mijëra qytetarë kanë marshuar rrugëve te kryeqytetit duke brohoritur parulla për UCK-në.

Situata në tërësi është nën kontroll.   Refki Morina, zëdhënësi i SHPK-së

Korrespondenti i BBC-së në Prishtinë thotë se protesta nisi e qetë nëpër rrugët kryesore të qytetit para se demonstruesit të konfrontoheshin me një barrikadë të forcave të KFOR-it.

Disa qindra demonstrues në Obiliq, në periferi të Prishtinës, i kanë vënë flakën gjatë orëve të mëngjesit disa objekteve të UNMIK-ut dhe serbëve.

Policia ka bllokuar qendrën e Obiliqit. Situata atje në mesditë paraqitej më e qetë dhe ishte nën kontrollin e policisë.

Demonstrata ka pasur edhe në Pejë, në Ferizaj, në Prizren, në Gjilan, dhe në qytete të tjera.

Zëdhënësi i Shërbimit Policor të Kosovës, Refki Morina, thotë se megjithë vështirësitë e mëdha gjendja e përgjithshme është nën kontroll të organeve të rendit.

"Situata në tërësi është nën kontroll," tha zoti Morina.

"Në Graçanicë dhe në Çagllavicë, ende ka bllokadë të rrugëve, ndërprerje të rrugëve kemi edhe në disa pjesë të Kosovës, mirëpo ato mund të kalohen me një kujdes më të shtuar," tha ai.

Zëdhënësi i policisë së Kosovës tha se kufiri me Serbinë dhe Malin e zi, është i mbyllur.

"Me Maqedoninë janë të hapura dy vendkalime kufitare, vetem për këmbësorë, ndërkaq kufiri me Shqipërinë është i hapur," tha ai.

Udhëheqja e Kosovës dhe UNMIK-ut kanë zhvilluar një takim për të diskutuar lidhur me gjendjen dhe masat për ndalimin e dhunës.

NATO ka njoftuar se një kompani prej rreth 150 ushtarësh është nisur për në Kosovë nga Bosnja.

Njoftohet se dy kompani të tjera, një italiane dhe një britanike, po përgatiten për t'u dërguar menjëherë në Kosovë për të përforcuar kontigjentin paqeruajtës prej rreth 17 mijë trupash.