Xhamia e Nishit e djegur nga protestuesit serbë

Burime serbe thonë se zoti Çoviq ka biseduar me shefin e UNMIK-ut, Hari Holkeri, dhe ka kërkuar garantimin e sigurisë së serbëve, të pronave të tyre dhe të objekteve të shenjta të Kishës Ortodokse Serbe.

Në Beograd kanë vazhduar protestat e serbëve në mbrojtje të bashkëpatriotëve të tyre në Kosovë.

Njoftimet nga Beogradi flasin se para selisë së qeverisë serbe janë tubuar mijëra njerëz në mbështetje të serbëve në Kosovë.

Një kolonë njerëzish është nisur në drejtim të ambasadës amerikane dhe asaj shqiptare.

Një zyrtar i ambasadës shqiptare në Beograd, këshilltari i ambasadës Xhevdet Osmani, tha se qindra vetë ishin mbledhur të enjten në mëngjes para ambasadës dhe kishin qëlluar me gurë në drejtim të ndërtesës.

"Kanë qenë disa qindra protestues, ambasada ka qenë e rrethuar me forca të shumta policore, disa kordonë, të cilat mbrojtën sigurinë e ambasadës," tha zoti Osmani për BBC në shqip.

"Në momentin që protestuesit filluan të qëllonin me gurë dhe me mjete të tjera të forta atëhere policia ndërhyri dhe protetuesit janë shpërndarë," tha ai duke shtuar se në qendër të Beogradit po zhvillohej një demonstratë e madhe.

Të mërkurën në mbrëmje protestat në Beograd morën përmasa të dhunshme. Është djegur xhamia e vetme në kryeqytetin serb dhe një tjetër në qytetin e Nishit.

Njoftimet flasin se ka pasur të lënduar si midis protestuesve ashtu dhe policëve serbë, që u përpoqën të kontrollonin dhunën.

Sikurse dhe gjatë natës së kaluar, edhe sot, protesta të dhunshme ka pasur edhe në Novisad, kryeqytet i krahinës së Vojvodinës.

Njoftohet se është djegur flamuri i kësaj province dhe në shënjestër të kritikave është gjetur edhe kryetari i parlamentit të krahinës, Nenad Çanak, i cili ka kritikuar ashpër politikën e autoriteteve serbe ndaj Vojvodinës.

Gjatë protestave në disa qytete tjera të Serbisë ka pasur edhe sulme ndaj pronave të pakta të shqiptarëve.