Përleshjet shpërthyen pas mbytjes së të paktën dy fëmijëve shqiptarë në lumin Ibër

Të dy palët kanë shkëmbyer zjarr armësh dhe granadash kur u përleshën në mëngjes në një urë që ndan qytetin e Mitrovicës.

Njoftimet nga Mitrovica flasin për zjarr sporadik armësh, por policia ndërkombëtare nuk mund të konfirmojë se nga vijnë të shtënat.

Forcat ndërkombëtare kanë vendosur gjendjen e shtet-rrethimit nga ora 19:00 deri në orën 07:00 të mëngjesit në Mitrovicë pas përleshjeve.

Paqeruajtësit e NATO-s kanë përdorur gaz lotsjellës dhe plumba plastikë në përpjekje për të kontrolluar dhunën.

Komandati i KFOR-it për Kosovën veriore, Xavier Mishel, e përshkoi ditën si të jashtëzakonshme, ndërsa shprehej i shqetësuar me sasinë e madhe të armatimit që ishte përdorur nga popullata civile.

"Ka qenë një ditë shume e keqe për Mitrovicën dhe tërë Kosovën," tha gjenerali Mishel.

"Ka qenë një ditë e vështirë edhe për trupat franceze të KFOR-it, kemi 10 të plagosur, dy prej tyre me plagë serioze," tha ai.

"Ushtarët tanë janë qëlluar ndërsa po përpiqeshin të mbronin popullatën civile," tha gjenerali Mishel.

Kjo është dhuna më e rëndë në Mitrovicë që kur nëntë persona u vranë në përleshje midis të dy komuniteteve katër vjet më parë.

Një zëdhënës i policisë ndërkombëtare, Derek Chappel, tha për BBC-në se ka patur njoftime për trazira edhe në disa qytete të tjera të Kosovës përfshirë Fushë-Kosovën, ku është sulmuar shtëpia e shëndetit, pastaj në Belo-Pole në afërsi të Pejës, në Vushtrri, në Lipjan, ku u sulmua selia e OKB-së.

Përleshjet ndodhin pas disa ditëve të tensionuara pas plagosjes së një të riu serb dhe mbytjes së të tre fëmijëve shqiptarë në lumin Ibër. Të dyja palët fajësojnë njëra-tjetrën për këto dy incidente.

Dënohet dhuna

U bëj thirrje qytetarëve të Mitrovicës të tërhiqen nga protestat dhe të qetësohet gjendja.   Ibrahim Rugova, president i Kosovës

Udhëheqësit e lartë të Kosovës, përfshirë shefin e UNMIK-ut, Harri Holkeri, e presidentin e Kosovës, Ibrahim Rugova, e dënuan dhunën dhe kryeministri Bajram Rexhepi po drejton operacionin për rivendosjen e qetësisë në qytetin e Mitrovicës.

Presidenti Rugova bëri thirrje për ndalimin e protestave.

"U bëj thirrje qytetarëve të Mitrovicës të tërhiqen nga protestat dhe të qetësohet gjendja, sepse eskalimi i gjendjes nuk është në të mirë të Kosovës," tha zoti Rugova.

"Kërkojmë nga të gjithë qytetarët e Kosovës të punojmë së bashku për forcimin e sigurisë dhe ruajtjen e rendit," tha ai.

Në Beograd, qeveria serbe po mban një takim emergjent të qeverisë.

Ish-zëvendëskryeministri serb dhe drejtuesi i Qendrës Koordinuese të Beogradit për Kosovën, Nebojsha Çoviq, tha se situata ështe tepër "e vështirë dhe e rrezikshme".

"I bëj thirrje KFOR-it dhe UNMIK-ut që të ndërmarrin gjithçka me qëllim të ndarjes së palëve," tha ai.

Zopti Çoviq shprehu keqardhjen për vdekjen e fëmijëve shqiptarë.

"Unë shpreh brengosjen dhe keqardhjen time për vrasjen e tre fëmijëve shqiptarë, njeriu është njeri, pavarësisht nga përkatësia e tij fetare ose kombëtare," tha ai.

Qindra të plagosur

Qindra shqiptarë u mblodhën të mërkurën në mëngjes në pjesën jugore të qytetit të ndarë për të shprehur indinjatën e tyre pas mbytjes së djemve shqiptarë. Serbët që kontrollojnë pjesën veriore u grumbulluan gjithashtu.

Paqeruajtësit bllokuan urën për të ndarë serbët dhe shqiptarët duke përdorur gazin lotsjellës, plumbat plastikë dhe granadat paralizuese.

Kur shqiptarët u përpoqën të kalojnë me forcë urën pati të shtëna armësh.

Katër shqiptarë dhe tre serbë besohet se kanë vdekur në përleshje. Burime të spitalit thanë se 250 vetë janë plagosur.

Ushtarët francezë janë plagosur nga gurët dhe copëzat e një granade, tha kapiteni Athanasios Zormbas, zëdhënës i KFOR-it.