Në Kajro u mbajtën "protestat më masive në historinë e Egjiptit"

"Pushteti - popullit: më në fund Mubarak përulet para së pashmangmes" - është kryeartikulli në The Guardian. Gazeta shkruan se skenat e shesheve në qytetet kryesore të Egjiptit të martën nuk mund të imagjinoheshin para dhjetë ditësh. Të frymëzuar nga qëndrimi korrekt e miqësor i ushtrisë, egjiptianët u derdhën të martën nëpër rrugë për të kërkuar largimin e një lideri që i kishte drejtuar për 30 vjet.

Në banderola e pankarta të shkruara në arabisht dhe disa gjuhë të botës, protestuesit shprehnin dëshirën e tyre: "Mbaroi! Largohu tani, që të të lëmë të qetë!"

Gazeta The Guardian shënon edhe ngritjen në përgjegjësi dhe rolin e tanishëm e ndoshta të ardhshëm të Omar Sulejmanit. Shefi i shërbimit egjiptian të kundërzbulimit, prej disa ditësh është emëruar zëvendëspresident. Gazeta e përshkruan zotin Sulejman, që ka studiuar në ish-Bashkimin Sovjetik dhe në Shtetet e Bashkuara të Amerikës, si negociator të zotin. Ai është ndër zyrtarët e rrallë egjiptianë që ka ruajtur edhe gradën ushtarake si gjeneral-lejtnant, edhe detyrën si anëtar i kabinetit qeveritar. Sikurse edhe përfaqësuesit e tjerë të lartë të ushtrisë egjiptiane, ai nuk është aspak miqësor ndaj Vëllazërisë Myslimane, të cilën e akuzon se nuk njeh gjuhë tjetër, veç asaj të forcës.

"Lamtumira e zgjatur e Mubarakut". Me këtë titull hapet të mërkurën The Times. Gazeta sjell pjesë të fjalimit të djeshëm të liderit egjiptian, mes të cilave premtimin e tij se "do të vdes në tokën egjiptiane".

Hosni Mubarak iu drejtua të martën kombit me nje fjalim ku u zotua se nuk do të garonte për pushtet në zgjedhjet e shtatorit, por protestuesit në ato që gazeta i cilëson si protestat më të mëdha në historinë e vendit, kërkojnë largimin e tij tani.

Gazeta shkruan edhe për detyrën e vështirë të të dërguarit të posaçëm amerikan ne Egjipt, ish-ambasadorit të Shteteve të Bashkuara në Kajro, Frank Wisner. "Gjatë ditëve të ardhshme ai duhet të mbyllë një prej kapitujve më të vështirë në diplomacinë moderne. Mikja e vjetër e presidentit Mubarak, Amerika, duhet ta bindë sundimtarin egjiptian, të largohet pas 30 vjetësh në pushtet", shkruan The Times.

"Mubarak premton të largohet pas presionit të Obamës", shkruan The Daily Telegraph. Presidenti 82 vjeçar Hosni Mubarak u detyrua të veprojë, pas dërgimit nga presidenti Obama të një emisari të posaçëm për t'i thënë se e kishte humbur mbështetjen dhe se ishte me rëndësi 'kritike' që ai të mbikqyrte një tranzicion drejt zgjedhjeve të lira në shtator.

Gazeta vëren se opinioni publik në Egjipt është i ndarë përsa i përket largimit më vonë të zotit Mubarak.

Ndërkaq kërkesa për ndryshime po përhapet në Lindjen e Mesme, shkruan gazeta, duke pcjellë vendimin e së martës të Mbretit Abdullah të Jordanisë për shkarkimin e qeverisë dhe premtimin e reformave politike, pas protestave nëpër rrugët e vendit.

"Vëmendja përqendrohet në ditët pas Mubarakut", shkruan The Financial Times, duke vërejtur se kërkesat e stuhishme për largimin e liderit kanë lënë në hije frikën për pasigurinë e së ardhmes.

Poshtë fotos së një protestuesi në Sheshin Tahrir të Kajros, që në një pankartë shpreh pakënaqësi për 'hipokrizinë amerikane', në diçiturë gazeta shkruan për dilemën e Shteteve të Bashkuara që përballen me kërkesat e protestuesve për demokraci dhe shqetësimin për sigurimin e stabilitetit në rajonin e Lindjes së Mesme.