Guvernatori ishte kundër ligjeve të blasfemisë

"Vrasja e guvernatorit hedh Pakistanin në krizë të re," shkruan Guardian dhe shton se ajo është një goditje për pakicën liberale të vendit.

Pakistanezët e thjeshtë, shkruan gazeta janë të hutuar teksa po përpiqen të pranojnë vdekjen e një politikani tjetër, tri vjet pas vrasjes së ish-kryeministres, Benazir Bhuto në duart e ekstremistëve.

Times i kujton lexuesit se vrasja e z. Taseer, aleat i kryeministrit Yusuf Gilani ndodhi në një moment shumë të vështirë për Partinë e tyre të Popullit të Pakistanit, pas tërheqjes nga koalicioni i dobët qeverisës i njërës prej partive opozitare.

Gazeta shkruan se mullahët ishin indinjuar me z. Taseer sidomos pasi ai vizitoi në burg të krishteren Asia Bibi që është dënuar me vdekje për fyerjen e profetit Muhamed.

Në një editorial, e përditshmja Independent shkruan se z. Taseer ishte 'një lloj i veçantë politikani që luftoi për tolerancë'.

Vrasja e tij, shkruhet në artikull, është 'një tragedi e vërtetë për pakicat e shumëvuajtura të Pakistanit që kanë humbur mbrojtësin e tyre më sypatrembur'.

Mësime për diplomatët

Independent njofton se stafet e ambasadave britanike në botë do të marrin 'mësime në diplomaci', si pjesë e procesit reformues të ndërmarrë nga qeveria re të vendit.

"Ministri i jashtëm, shkruan gazeta, beson se aftësi esenciale diplomatike janë neglizhuar në të shkuarën, si p.sh. në sigurimin e avantazhit maksimal për Britaninë në negociata me vendet e huaja".

Independent nënvizon se Z. Hague beson se në kohën e qeverisjes së Tony Blair-it në veçanti, centralizimi i pushtetit në Downing Street, bëri që Foreign Office të lihej mënjanë, gjë që 'ndikoi në moralin e stafit diplomatik dhe në mungesën e një strategjie koherente'.

10 vjeçari akuzohet për vrasje

Times ia kushton vendin kryesor në faqet ndërkombëtare një korrespondence nga Shtetet e Bashkuara, ku njoftohet se një 10 vjeçar nga Ohio akuzohet se ka vrarë të ëmën, 'në një rast që ka tronditur fqinjë dhe policë'.

Gazeta shkruan se motivi i vrasjes, që ka ndodhur në një zonë rurale, ishte i paqartë, por një sherif spekuloi se ajo mund të ketë pasuar një zënkë me të ëmën, pasi iu kërkua që të mblidhte dru.

Times njofton se policët që po hetojnë rastin, thonë se djaloshi, i cili nuk mund të identifikohet për arsye ligjore, mund ta kishte marrë pushkën me të cilën vrau të ëmën si dhuratë nga gjyshi i tij i ndjerë.

Ata, shkruan gazeta, gjetën katër armë në dhomën e tij të gjumit: tri pushkë dhe një automatik.

Shpresa për mbirjen e flokëve?

The Daily Telegraph shkruan në faqen e parë se shkencëtarët u kanë dhënë shpresa të reja personave që u kanë rënë flokët.

Ata kanë gjetur se qelizat në kokat e pacientëve që bëjnë transplantim flokësh, mund të riaktivizohen.

Studiuesit në Universitetin e Pensilvanisë kanë zbuluar se lëkura në kokat e qerosëve ka po aq shumë qeliza sa ajo e atyre me flokë, por ato të të parëve, kanë humbur aftësinë për t'u shndërruar në flokë.

Eksperimetet në laborator me minj kanë treguar se riaktivizimi i geneve mund të çojë në rritjen e flokëve, gjë që mund të çojë në mjekime të reja, shkruan gazeta