Kryeministri konservator Cameron dhe zv/kryeministri lib-dem Clegg

E përditshmja The Daily Telegraph, dy gazetare të së cilës kanë regjistruar bisedat në mirëbesim me zyrtarë të lartë liberal-demokratë, hapet të enjten me titullin: Nuk mund t'i besohet [kryeministrit] Cameron dhe [ministrit të financave] Osborne!
Nënkryetari liberal-demokrat i Dhomës së Komuneve, David Heath citohet të ketë thënë se ministri i financave është person që ta sjell në majë të hundës dhe se nuk e ka idenë se çfarë do të thotë të humbësh 100 stërlina në vit, aq sa do të jetë ulja e ndihmës që marrin për fëmijët punonjësit me paga të larta.

Ministri liberal-demokrat i përkujdesjes sociale, Paul Burstow, u ka thënë gazetareve të The Daily Telegraph se 'nuk duhej t'i besonin kryeministrit Cameron'.

Ministri për pushtetin lokal, Andrew Stunnell ka thënë se nuk është i sigurtë se në ç'nivel do të ishte kryeministri konservator nëse shihej me një "monitor sinqeriteti".

Privatisht, zëvendësministri i transportit, Norman Baker i ka krahasuar konservatorët në qeveri me regjimin e aparteidit në Afrikën e Jugut dhe ka thënë se detyra e tij ishte që të fushatojë nga brenda qeverisë.

Deklarimet e mësipërme të regjistruara nga dy gazetare që ishin paraqitur si votuese të shqetësuara liberaldemokrate, po ndiqen me interes për të parë ndikimin në marrëdhëniet politike në gjirin e koalicionit qeveritar britanik.

Në një regjistrim të ngjashëm, ministri për çështjet e biznesit, Vince Cable, sillet të ketë bërë deklarime të pamatura në lidhje me një përpjekje biznesi nga ana e rrjetit mediatik News Corporation, të drejtuar nga Rupert Myurdoch.

Gazeta The Times shkruan se disa deputetë konservatorë me emër kanë kërkuar largimin nga qeveria të liberaldemokratit Cable.

Duke trajtuar të njëjtën çështje, The Guardian sjell komentet e shefit për çështjet politike në qeveri, Oliver Letwin, sipas të cilit, liberaldemokratët dhe konservatorët kanë krijuar një marrëdhënie te fortë koalicioni dhe kanë arritur më shumë se sa do të mund të kishte realizuar një qeveri konservatore e ardhur në pushtet jo me shumicë votash.

The Independent, në faqen e shkrimeve redaksionale, shkruan se 'liberal-demokratët fajësohen nëse veprojnë dhe fajësohen sërish nëse nuk veprojnë. Nëse e mbyllin gojën për punën e koalicionit, akuzohen se janë kripto-konservatorë dhe punojnë aktivisht për realizimin e një axhende radikale djathtiste. Nëse shprehin rezerva për politika të caktuara të koalicionit qevertar, etiketohen si lolo fatkeqë që nuk mund të ndikojnë në vendimet e një qeverie që de facto është konservatore'.

Këtë javë, shkruan gazeta, jemi bërë dëshmitarë të realitetit të qeverisë së koalicionit. "Është një realitet i pakëndshëm dhe i rrëmujshëm".

E megjithatë, shkruan gazeta The Independent, fatkeqësisht, për ata që janë kundër koalicionit qeveritar, zbulimi së fundmi i ndjenjave anti-konservatore nga disa zyrtarë liberaldemokratë, nuk çon dot në rënien e qeverisë.